Gjermania paralajmëron deputetët se iPhone-ët e tyre ndoshta janë hakuar me softuer spiunues: Apple dërgoi paralajmërime në 99 vende, ndërsa kush qëndron pas sulmeve nuk dihet

Shërbimi federal gjerman për sigurinë kibernetike, BSI, njoftoi gjatë fundjavës se deputetë në Bundestag dhe personalitete të tjera të njohura, të paemëruara, kanë marrë paralajmërime nga Apple se telefonat e tyre ndoshta kanë qenë shënjestër sulmi. Disa ditë më parë Apple filloi t'u dërgojë njoftime njerëzve për të cilët mendon se janë sulmuar me softuer spiunues.

Zëdhënësi i Qeverisë Stefan Kornelius deklaroi se Berlini „e merr shumë seriozisht incidentin dhe paralajmërimin“, por nuk tha kush në qeverinë federale ishte në shënjestër. As nëse mes tyre është edhe kancelari Friedrich Merz. A nuk e di Berlini, apo nuk do ta thotë?

Ky lloj softueri spiunues mund të vjedhë mesazhe, vendndodhje dhe të dhëna të tjera të ndjeshme nga telefoni, dhe shpesh përdor sulme për të cilat viktima nuk duhet të klikojë në link as të hapë skedar. Telefoni depërtohet pothuajse në mënyrë të padukshme. Apple nuk thotë cila qeveri qëndron pas sulmeve, as nuk konfirmon nëse ndonjë telefon vërtet është komprometuar. Prandaj BSI u thotë të gjithë atyre që kanë marrë një njoftim të tillë „të supozojnë se pajisja e tyre ndoshta është komprometuar“.

Gjermania nuk është e vetme. Kineasti nga Bejruti Radwan Mortada, i sulmuar tashmë me softuer spiunues në vitin 2021, publikoi në X se ka marrë një njoftim të ri për „edhe një sulm ndaj pajisjes suaj“. Sipas atij njoftimi, vala e fundit e paralajmërimeve nga Apple shkoi te përdoruesit në 99 vende. Kush qëndron pas këtij raundi sulmesh dhe cila qeveri e porositi, për momentin nuk dihet.

Këtu historia bëhet e pakëndshme për Berlinin. Qeveritë rrallë i bëjnë vetë këto mjete - i blejnë nga firma private që në industri quhen „mercenarë“ të softuerit spiunues. Më e njohura është izraelitja NSO Group, e cila shet Pegasus-in e diskutueshëm. Ndërsa policia kriminale federale gjermane, BKA, sipas informacioneve të publikuara, kishte blerë qasje në Pegasus që në vitin 2019. Shteti që sot numëron telefonat e hakuar të deputetëve të vet ka bërë vetë pazar në atë treg.

Ballkani historitë për politikanë të përgjuar i di përmendësh, dhe kjo është një kujtesë se telefoni i politikanit prej kohësh është vija e parë e frontit. Nëse mund të depërtohet telefoni i një deputeti gjerman, sa i sigurt është telefoni i çdo ministri në rajon?