Spotify додава уште едно ВИ копче. Овојпат тоа е разговорен помошник – нешто налик на ChatGPT, вграден директно во апликацијата, со кое корисниците можат да разговараат за да пронајдат музика, подкасти или аудиокниги. Пишуваш или зборуваш, а помошникот одговара, предлага, се сеќава што си слушал и ти кажува кога излегол некој албум или од што бил инспириран.

Функцијата е засега во бета-фаза, само за Premium претплатници, на iOS и Android, и само во три земји – САД, Ирска и Шведска – за корисници над 18 години што комуницираат на англиски. Македонија, како и обично, чека. Технологијата, се вели, комбинира сопствени системи на Spotify со модели од повеќе надворешни добавувачи, избрани според задачата.

Ова не е првиот пат Spotify да турка вештачка интелигенција во ушите на слушателите. Претходно дојде ВИ диџеј што зборува со глас, па алатка за градење плејлисти преку текстуални барања. Секоја од нив се најавуваше како чекор напред. Секоја од нив, всушност, прави едно исто нешто: те задржува во апликацијата подолго и собира повеќе податоци за тоа што сакаш.

Прашањето за слушателот е едноставно. Дали навистина ти треба разговор со апликација за да најдеш песна – или само сакаш да притиснеш play? Некогаш дискографот во продавницата ти препорачуваше плоча бидејќи те познаваше. Сега алгоритмот ти препорачува бидејќи те мери. Разликата не е мала, само добро е скриена зад пријателскиот тон.