Një zëvendëskryeministër që me muaj nuk vinte në punë, fotografohej në destinacione ekzotike, ndërsa Qeveria fshihte nëse ende merrte pagë - më në fund dha vetë dorëheqjen. Arben Fetai, zëvendëskryeministri i Qeverisë për qeverisje të mirë, u largua nga funksioni „me kokë lart e ndërgjegje të pastër". Ironia se pikërisht resori për „qeverisje të mirë" e prodhoi një histori të tillë vështirë se mund të jetë më e madhe.

Fetai e shpalli dorëheqjen në rrjetet sociale, me mesazhe për reforma, llogaridhënie e transparencë. „Pata nderin dhe privilegjin t'i shërbej shtetit... një mision po aq i rëndësishëm sa edhe mosmirënjohës", shkroi, duke shtuar se nuk është plotësisht i kënaqur me të arriturat, por se ka punuar për të vendosur „themele të shëndosha".

Problemi është se publiku me muaj bënte pyetje krejt të tjera - dhe nuk mori përgjigje për asnjërën. Ku është Fetai? A është në Maqedoni apo në Bruksel, nga ku erdhi? A merr ende pagë edhe pse me muaj nuk është në punë? Kryeministri Mickoski heshti. Heshti edhe nënkryetari i Kuvendit Antonio Milososki kur iu kërkua që zëvendëskryeministri të paraqitej në një seancë për pyetje deputetësh.

Skena në Kuvend ishte domethënëse: deputetja e LSDM-së Daniela Nikollova kërkoi të sigurohej prania e Fetait, e Milososki - nuk dinte çfarë të përgjigjej. Ndoshta sepse e vetmja përgjigje e disponueshme ishte e pakëndshme: sipas vetë kryeministrit, Fetai i kishte thënë se nuk e sheh veten pjesë të qeverisë që ai e udhëheq. Një njeri me atë qëndrim u ul me muaj në kolltukun e zëvendëskryeministrit.

Tani, kur Mickoski gjithsesi paralajmëron rikonstruksion të qeverisë në qershor, Fetai e bëri vetë lëvizjen e parë. Pyetja që mbetet nuk është për „kokën lart" të tij - por për të gjithë muajt në të cilët një funksion ekzistonte vetëm në letër, ndërsa paga, ambientet dhe vendi në qeveri qëndronin të rezervuara për dikë që thjesht nuk vinte. Kush e pagoi atë faturë, dhe pse u desh kaq gjatë për të konstatuar të dukshmen?