Неколку дена пред претседателката на Европската комисија, Урсула фон дер Лајен, да слета во Скопје, владата испраќа нова порака кон Брисел: разговорите со Бугарија да не бидат повеќе само билатерални, туку во европски формат, со претставници на ЕУ на масата. Премиерот Христијан Мицкоски вели дека е пожелно дијалогот со Софија да продолжи со посредство на европски претставници, за да се слушнат аргументите на двете страни. Црвените линии, додава, остануваат – без отстапки.

Во позадина стои текстот на бриселскиот Политико, кој, повикувајќи се на двајца високи претставници на Комисијата, пишува дека ЕУ подготвува „патокази“ за пристапување за Црна Гора, Албанија, Украина и Молдавија. Македонија, Косово и Босна и Херцеговина ги нема на таа листа.

Мицкоски веста ниту ја потврдува, ниту ја прифаќа. „Таа информација ја објави медиум, не знам дали е точна, а ако е точна треба да се праша ЕУ зошто е тоа така“, изјави тој, потсетувајќи дека земјата испорачала најголем дел од реформите од Реформската агенда и Планот за раст. „Ако пристапувањето во ЕУ е процес во кој се оценува врз основа на заслуги, за мене ова е нелогично.“ Неговите информации, вели, се поинакви.

Посредник – излез или уште една чекалница?

Идејата за европско посредништво има своја логика. Скопје одамна бара гаранции дека исполнувањето на сегашниот услов – уставните измени со кои Бугарите би влегле во Уставот – нема да биде проследено со нови барања од Софија. Оттаму и инсистирањето на „предвидливост“. Брисел, од друга страна, останува на ставот дека токму тие уставни измени се следниот неопходен чекор. Засега нема официјална потврда дека каков било нов формат навистина е договорен.

Опозицијата не ја купува приказната. Од СДСМ го обвинуваат премиерот дека им ја одзел европската иднина на граѓаните, со реторика што тешко може да се помеша со дипломатија: „Нема двајца Мицкоски. Има еден арамија. Во опозиција брани колективен интерес. На власт го продава.“

Македонија е кандидат за членство од 2005 година. Украина и Молдавија кандидатски статус добија во 2022 година, а според Политико веќе се на листата за патокази. Посредникот може да помогне само ако има јасен мандат и рок. Без тоа, прашањето е дали добиваме решение – или уште еден шалтер пред кој ќе чекаме, овојпат со европски печат.