Иран ги прекина преговорите со Соединетите Американски Држави поради продолжувањето на израелските воени операции, соопштија ирански државни медиуми. Тегеран порача дека нема да испрати дипломатска делегација во Пакистан додека не се воспостави примирје во Либан.

Иранските власти му соопштија на Пакистан дека нема да учествуваат на преговорите во Исламабад под сегашните услови. Официјални претставници од Тегеран негираа дека каква било делегација веќе пристигнала во пакистанскиот главен град, потврдувајќи дека дипломатските контакти остануваат блокирани.

Тегеран ја обвини Вашингтон дека не успева да ги обузда израелските воени дејства, предупредувајќи дека неуспехот да се постигне примирје може да доведе до целосен колапс на мировните преговори.

Одлуката на Иран претставува сериозен удар за дипломатските напори на американскиот претседател Доналд Трамп, кој во последните недели инсистираше на продолжување на директните разговори меѓу Вашингтон и Тегеран. Прекинот на дијалогот доаѓа во момент кога тензиите на Блискиот Исток се на највисоко ниво во последните месеци.

Според дипломатски извори, клучна пречка за продолжување на преговорите е ситуацијата во Либан, каде израелската војска продолжува со интензивни операции против Хезболах. Иран смета дека без конкретни чекори кон примирје, секој обид за дипломатско решение е осуден на неуспех.