Во Вишото јавно обвинителство во Зајечар пристигна извештајот од судските вештаци од Белград, кои ги анализираа фактите собрани на терен за време на реконструкцијата на исчезнувањето и убиството на двегодишната Данка Илиќ.
Според наодите, резултатите го потврдуваат временскиот и просторнот тек на настаните од кобниот ден во март минатата година, а истражителите остануваат при сомнежите дека девојчето било удрено со автомобил, а потоа убиено.

За злосторството во Банско Поле кај Бор се сомничат Дејан Драгијевиќ и Срѓан Јанковиќ, кои во јуни беа доведени на лице место за реконструкција.

„Во анализата се поклопуваат времето, изјавите на сведоците и трагите. Сега ги очекуваме резултатите од Факултетот за технички науки во Нови Сад, кои треба да потврдат дали возилото на осомничените навистина го удрило девојчето,“ соопшти Обвинителството.

Експертите од Нови Сад ја анализираат брзината и траекторијата на возилото и секунда по секунда ги споредуваат податоците од камерите и сведочењата.

Адвокатката Милица Митровиќ, пак, смета дека обвинителството сè уште нема докази дека детето навистина е мртво.

„Пред сè, треба да се утврди дали има докази дека детето не е живо. Сè додека тоа не се потврди, тешко е да се говори за тешко убиство,“ изјави таа за „Курир“.

Новинарот Младен Радуловиќ додава дека ова вештачење може да биде пресвртно – ако не се докаже дека девојчето било удрено, обвинетите би можеле да бидат пуштени на слобода.

„Ова е една од најголемите мистерии во поновата историја на Србија. Детето исчезна за неколку минути без трага – и покрај огромната потрага на терен,“ рече Радуловиќ.

Новинарот Недиќ дополнително предупреди дека на местото на настанот никогаш не бил направен увид, бидејќи случајот првично бил третиран како исчезнување, а не убиство.

„Нема тело, нема директни докази дека автомобил го удрил детето. Единствено е сигурно дека Данка била таму, мајката ја сликала, а потоа исчезнала. Осомничените биле на тоа место и тоа го признале,“ изјави Недиќ.

Истражителите сè уште се надеваат дека резултатите од новото вештачење ќе донесат пресврт во случајот што ја потресе цела Србија.