Министерот за внатрешни работи на Србија, Ивица Дачиќ, се огласи по тешката сообраќајна несреќа што вчера се случи кај Сремска Митровица, во која животот го загубија три лица.

Тој изјави дека сите околности околу трагедијата ќе бидат детално испитани, но според првичните информации, причина за превртувањето на автобусот била неприлагодена брзина.

„Во несреќата загинаа три лица, а во автобусот имало повеќе од 80 патници. Според последните податоци, 57 се повредени, а седум до осум се во потешка состојба, но стабилни. Ова е навистина тешка трагедија,“ изјави Дачиќ за ТВ Прва.

Тој додаде дека според извештаите на сообраќајната полиција, возачот е одговорен за несреќата поради тоа што возел со несоодветна брзина за условите на патот.

„Се разбира, сега тоа треба да го потврди истрагата. Возачот имал 69 години и неодамна му било продолжено лекарското уверение, дури и со ознака дека е „неограничено“ способен за возење. Треба да се испита како и зошто тоа било дозволено,“ нагласи министерот.

Дачиќ истакна дека иако ниту една анализа нема да ја ублажи болката на семејствата што ги изгубија своите најблиски, државата мора да извлече поуки од ваквите трагедии и да ги преиспита сите пропусти во системот на контрола и безбедност.