Премиерот на Црна Гора, Милојко Спајиќ, објави дека владата денеска ќе донесе одлука за привремено укинување на безвизниот режим со Турција, откако во подгоричката населба Забјело беше избоден и тешко повреден жител на градот.

„За да се зачува економската активност и добрите билатерални односи, во наредниот период ќе иницираме интензивни разговори со Република Турција со цел да се најде најдобриот модел во заеднички интерес,“ напиша Спајиќ на социјалната мрежа X (поранешен Twitter).

Одлуката следи по воведувањето на вонредна состојба во Забјело, каде што полицијата спроведе рации и засилени контроли поради насилниот инцидент. Според локалните медиуми, тројца турски државјани биле забарикадирани во казино, откако група жители се обиделе да се пресметаат со нив.

Полицијата потоа привела двајца турски државјани, а еден од нив е осомничен за вмешаност во нападот. По интервенцијата на полицијата, групата револтирани граѓани се растурила, а редот бил воспоставен.

Порталот Вијести претходно објави дека тројца напаѓачи избоделе и претепале жител на Подгорица, идентификуван како М. Ј., кој се здобил со тешки повреди.

Властите апелираат на смиреност и воздржаност, додека трае истрагата за нападот и околностите што довеле до ескалација на тензиите.