Италијанската Bending Spoons ја купува американската Airtable за 1,28 милијарди долари (околу 1,18 милијарди евра) во кеш. Ова е првото купување на миланската фирма откако излезе на берза минатиот месец со проценета вредност од 18 милијарди долари, и совршено го опишува моделот по кој работи.

Airtable е основана во 2013 и досега собрала над 1,4 милијарди долари низ повеќе кругови на финансирање. Во 2021, кога парите беа евтини и секој софтвер за табели изгледаше како следната револуција, вредеше над 11 милијарди. Оваа година нејзините акции на секундарните пазари се тргуваа при проценета вредност од 4 милијарди. Купопродажната цена сега е 1,28 милијарди. Значи компанијата не пропадна – таа едноставно се врати таму каде што ѝ е местото откако ентузијазмот испари.

И тука е бројката што ја прави приказната поинтересна од обичен пад. Airtable има годишен повторлив приход од околу 480 милиони долари, со раст од над 20 отсто на годишно ниво, и опслужува преку 500.000 организации меѓу кои 80 отсто од Fortune 100. Ова не е фирма без клиенти. Ова е фирма што во 2021 беше проценета далеку над она што пазарот подоцна беше подготвен да го плати.

Лука Ферари, основачот на Bending Spoons, тоа го спакува во стандардна корпоративна реченица: „Airtable е пионерски бренд што го преобликува начинот на кој тимовите ги организираат податоците.” Она што фирмата всушност го прави е попознато: купува компании што се тргуваат под своите приватни проценки, го крати персоналот, ги поедноставува производите и ги тера да работат профитабилно. Evernote, WeTransfer, EventBrite, Vimeo – сите поминале низ истата машина.

Ова е европска фирма што собира американски софтверски брендови по намалена цена, што само по себе е поинаква приказна од онаа што обично ја слушаме за односот меѓу Силикон Вали и Европа. Прашањето што им останува на 500.000 организации што ја користат Airtable е поедноставно: што точно се поедноставува следно, и кој ќе го забележи прв?