Руската страна се согласила да го продаде својот удел во Нафтената индустрија на Србија (НИС), кој изнесува 56,15%, пренесуваат српските медиуми. Информацијата ја потврди српската министерка за рударство и енергетика, Дубравка Ѓедовиќ Хандановиќ.

Министерката изјави дека преговорите за продажбата веќе се во тек, при што Србија е директно вклучена, имајќи го предвид фактот дека државата е втор најголем акционер со 29,8%.

„Руските сопственици се согласиле да го продадат својот удел. Ние сме информирани и активно ги следиме разговорите, бидејќи е од витален интерес НИС да продолжи да работи успешно. Тоа е клучно за енергетската стабилност на нашата земја“, изјави Ѓедовиќ Хандановиќ.

Министерката посочи дека државата свесно не открива кој е потенцијалниот купувач.

„Станува збор за сериозни деловни преговори. Додека не се финализираат или барем не се усогласат најважните детали, не е професионално да се објавуваат имиња. Ништо не се крие од јавноста – досега сме комуницирале транспарентно“, нагласи таа.

Приоритет на Србија, како што додаде, е рафинеријата да продолжи со работа и што поскоро да се обезбеди нов проток на сурова нафта преку ЈАНАФ.

Паралелно со преговорите за продажбата, НИС преку адвокати во САД поднел барање до американската влада за продолжување на лиценцата за работа.

Целта е компанијата да продолжи со набавка на сурова нафта и непречено функционирање на рафинеријата.

„Сега ја чекаме одлуката на американската влада дали предложениот модел, во кој и ние сме директно вклучени, ќе биде прифатен“, изјави министерската.