Претседателот на Србија, Александар Вучиќ, остро реагираше на медиумските обвинувања дека наводно имал улога во монструозното „Сараевско сафари“, и најави дека ќе ангажира врвни меѓународни адвокати за да ги тужи медиумите кои ја објавија оваа информација.

Реакцијата следи откако хрватскиот новинар Домагој Маргетиќ поднесе пријава во обвинителството во Милано, тврдејќи дека Вучиќ учествувал во активностите поврзани со „Сараевското сафари“ — случај што го истражуваат италијанските власти.

„Кога некој толку очигледно лаже, мора и да плати многу. Ќе ги собереме најдобрите адвокати и за 15 дена ќе видиме што следува,“ изјави Вучиќ, пренесува Телеграф.

Тој нагласи дека тужбите нема да ги финансира со сопствени средства, туку адвокатите ќе бидат платени од евентуалната надоместена штета, која, како што вели, планира да ја донира за изградба на манастир.

Вучиќ подвлече дека досега никогаш не поднел тужба против медиум, иако, според него, бил често предмет на „лажни написи“. Овојпат, вели тој, ќе се постапува против „медиуми со многу пари“, меѓу кои ги спомена Гардијан, Дејли Меил и други.

Во меѓувреме, германскиот „Франкфуртер алгемајне цајтунг“ повторно го отвори прашањето за оваа мистериозна и контроверзна тема, прашувајќи: „Што стои зад триесет години старата приказна?“ Според документарните наводи, за време на опсадата на Сараево (1992–1995), богати странски државјани наводно плаќале за да пукаат врз цивили од позициите над градот.