Профилот „Lingue Maps“ објави нова мапа на Европа која го прикажува проценетиот сеизмички ризик по региони, категоризиран во три зони:
висок ризик (црвена), средно-низок ризик (портокалова) и многу низок ризик (зелена).

Според прикажаните податоци, Балканот е означен како едно од најризичните подрачја во Европа. Хрватска, Босна и Херцеговина, Словенија, Црна Гора, Албанија, Македонија, Грција и западниот дел на Турција се прикажани во интензивна црвена боја која означува висок степен на опасност од земјотреси.

Поделба по зони

Според мапата:

• Најголем дел од Балканот – црвена зона (висок ризик).

• Западна и северна Европа – темнозелена зона (многу низок ризик), меѓу кои Ирска, Велика Британија, Скандинавија, балтичките земји и Полска.

• Србија, Шпанија, Португалија, Франција, Австрија и Унгарија – главно во портокалова зона (среден ризик), при што некои делови преминуваат во црвено.

• Италија е речиси целосно обоена во црвено, што ја поставува меѓу најекспонираните земји во Европа во однос на сеизмичка активност.

Авторите предупредуваат дека делови од мапата може да бидат неправилно прикажани поради сложената геометрија на одредени региони. Дополнително, некои стари и неактивни тектонски линии не се прикажани, па затоа резултатите треба да се толкуваат со претпазливост.

Иако мапата создаде големо интересирање кај корисниците и нуди визуелен увид во просторната распределба на ризикот, конечни заклучоци може да се извлечат само ако се знаат точните извори, методологијата и моделите врз кои се темели проценката.

Поради тоа што различни сеизмички модели даваат различни резултати, експертите советуваат секогаш да се консултираат повеќе научни извори и официјални сеизмолошки институции.