Автоматски пушки, рамки за автоматски пушки, снајперска пушка, пиштоли, муниција од различен калибар, тактички елек, радиоврски и официјално знаме на ИСИС. Ова не е реквизита од воен филм, туку списокот на она што полицијата го одзеде од 12 локации низ Скопје, меѓу кои Сингелиќ, Чаир и Брест, во заедничката акција на МВР, АНБ и Обвинителството за гонење организиран криминал и корупција.

Претреси кај шест лица, пет лишени од слобода, тројца под истрага. Против првоосомничениот К.И. (34) е поднесена кривична пријава за тероризам и за неовластено изработување, држење, посредување и тргување со оружје или експлозивни материи. Б.А. (24) и Е.С. (30) се товарат за оружјето. Обвинителството побара притвор од 30 дена за тројцата.

Според МВР, К.И. почнал да делува уште во 2023 година, во огранок со идеолошка матрица на ИСИС. Индоктринирал млади луѓе, ширел пропаганден материјал со екстремна и радикална содржина и набавувал огнено оружје. Три години. Колку млади поминале низ неговите раце за тоа време, засега никој не кажува.

Имами, киднапирања и струја за криптовалути

АНБ ја опишува групата како верско-радикална групација поврзана со транснационални криминални организации: насилство, изнуда, киднапирање, лихварство, трговија со дрога и со оружје. „Исламско радикалниот елемент е одлика што е заемна кај повеќето членови на групата, имено истите се идеолошки следбеници на радикални имами, кои се поддржувачи и прокламатори на меѓународни терористички организации“, велат од Агенцијата. Дел од уапсените, додаваат, се во блиски врски со странски терористички борци од земјава и од регионот.

Меѓу снајперите и знамето се најде и детал кој речиси звучи комично: при претресите е утврдено неовластено користење електрична енергија за „копање“ криптовалути. Радикализам на збор, а сметката за струја ја плаќа некој друг.

Најважната реченица во целото соопштение сепак е друга. АНБ вели дека верските објекти каде што се практикува радикалниот ислам и онлајн-радикализацијата се „иницијални тригери за регрутација на младите“. Ако службите знаат кои се тие објекти и кои се тие канали, прашањето е едноставно: што се презема таму, пред некој да стигне до снајпер?

Трагата стоела во судските списи

До групата не се стигнало од нула. Обвинителството наведува дека истрагата се темели на докази од претходна предистражна постапка, на документација и докази од предмет што веќе е во фаза на судење, како и на докази добиени преку меѓународна правна помош. Со други зборови, дел од трагата веќе постоел во судницата, а дел стигнал однадвор.

Ова не е прв ваков случај. Во мај 2026 година ОЈО ГОКК соопшти дека пет лица се под истрага за „терористичка организација“, а во декември 2024 беа приведени четири лица од Гостивар и Струга под истиот сомнеж. Балканот добро ја знае приказната за странските борци и за оние што се вратија од нив. Затоа прашањето по секоја ваква акција е исто: дали ќе заврши со пресуда, или само со уште една фотографија од запленето оружје на маса?