Вашингтон ги суспендира Microsoft и Adobe од програмата за зелени карти: Венс бара „одлични американски работници“, компаниите се обвинети за измама

Администрацијата на Доналд Трамп ги суспендира Microsoft, Adobe и уште неколку технолошки компании од програмата преку која квалификувани странски работници добиваат трајно право на престој во САД – таканаречената зелена карта. Образложението не е бирократско, туку тешко: власта ги обвинува компаниите за измама.

На листата се и Capgemini, Cognizant, HCL, Infosys, Tata и Wipro – имиња што секој програмер на Балканот ги знае од огласите за работа. Министерот за труд Кит Сондерлинг соопшти дека државата нема да прифаќа ниту нови, ниту веќе поднесени барања за трајна работна сертификација во кои се вмешани овие фирми. Со други зборови, и оние што веќе чекаат во редот остануваат заглавени.

Политичката порака ја испрати потпретседателот Џеј Ди Венс: „Нашата порака до Microsoft е: Вие сте одлична американска компанија, но мора да вработувате одлични американски работници.“ Комплимент и шамар во една реченица – стил на политичар што знае дека камерите снимаат.

Microsoft не молчи. Компанијата вели дека најголемиот дел од нејзините вработени во САД се Американци, дека од околу 6.000 барања за визи H-1B минатата фискална година дури 80 отсто биле за продолжување или промена на статусот на луѓе што веќе работат кај неа, и дека на странските работници им плаќа исто колку и на другите за иста работа. Adobe засега не одговори.

Визите H-1B се наменети за високостручни позиции што работодавачите тешко ги пополнуваат со домашни кадри, а речиси три четвртини од одобрените визи одат кај работници од Индија. Затоа не е случајно што на листата завршија и најголемите индиски ИТ-компании. Венс најави и истрага за девет универзитети, меѓу кои Харвард, Јеил и Стенфорд, за наводна злоупотреба на програмата за странски студенти со цел да се спуштат платите на Американците.

Зелената карта со години е цел за инженерите што ги пакуваат куферите кон американските технолошки центри, вклучително и од нашиов регион. Ако вратата се стеснува дури и кога зад барањето стои компанија од големината на Microsoft, што останува за оние чиј работодавач нема толкава тежина во Вашингтон?