„Сини очи, европски изглед и хиџаб“: платформа ги претставува Бошњачките како посакувани сопруги за муслимани од странство

Сини очи, „европски изглед“ и хиџаб. Така Тарек бин Захв, основачот на платформата за склопување бракови Zefaaf, ги опишува жените од Босна и Херцеговина во видеата што изминатите денови кренаа бура во земјата. Бошњачките во неговите снимки се претставени како потенцијални сопруги за муслимани од странство.

Херцеговките ги опишува како силни, искрени и одани жени што се грижат за децата и за мажите, со посебен акцент на нивната убавина и висина. Во друго видео тврди дека девојките од Бихаќ доаѓаат на студии во Сараево и таму бараат маж за да останат во градот. Една од снимките е направена во сараевското кафуле „Диван“, чии сопственици веднаш се оградија: снимањето не било одобрено, авторот повеќе нема да биде добредојден, а случајот ќе го пријават до надлежните институции.

Што нуди Zefaaf

Zefaaf се претставува како платформа за запознавање муслимани што сакаат брак, со вклучување на родителите и семејството, и тврди дека користи вештачка интелигенција за поврзување партнери во безбедна средина, според шеријатските правила. Програмата за БиХ организира средби на мажи заинтересирани за брак со жени и семејства во земјата, го координира запознавањето и може да подготви писмо-покана како поддршка за барање виза. Учеството чини 500 евра, додека за босанските семејства е бесплатно. Пријавите, според објавите на блогот на платформата, одат преку Telegram, а самата платформа наведува дека патувањето не гарантира брак.

Бесот во јавноста не е само поради коментарите за изгледот. Луѓето реагираа на тоа што жените се сведени на список особини што наводно ги прават пожелни сопруги: изглед, хиџаб, верност на мажот и скромен мехр, свадбениот дар што ѝ припаѓа на сопругата. Дел оценија дека жената така се сведува на стока, а во поединечни коментари платформата беше обвинета и за трговија со луѓе. Zefaaf одговори со исклучување на коментарите на дел од објавите.

Потоа стигна и официјалниот одговор. Платформата ги отфрли обвинувањата за трговија со жени и за нивно искористување, порачувајќи дека поврзува полнолетни муслимани што сакаат брак, со учество на семејствата, и дека не е наменета само за Бошњаци. Оттаму порачаа и дека жената не е стока, дека нејзиното достоинство не зависи од националноста и дека прифаќаат аргументирана критика, но ги отфрлаат клеветите, заканите и понижувањето. Со првото тешко дека некој не се согласува. Прашањето е зошто тогаш нивните видеа звучат како каталог.

СИПА проверува, истрага засега нема

Во случајот се вклучи и Државната агенција за истраги и заштита (СИПА), која потврди дека добила пријава и ги проверува наводите од неа. Тоа сè уште не значи дека е отворена истрага или дека е утврдено кривично дело. Пријавата ја поднесе Ервин Чустовиќ од неформалната група граѓани „Кошница“. Тој ѝ достави на агенцијата јавно достапни објави за Zefaaf и Rewaq Events и побара да процени дали треба да се направат проверки и да се вклучат други институции.

Сараевскиот имам Мухамед Велиќ предупреди дека постапките на поединци не смеат да им се припишуваат на сите Арапи што живеат во БиХ. Но тој повлече и остра паралела, со нападот врз ученик на исламско училиште во Бања Лука. „И едните и другите гледаат на нив како на туѓо младо месо врз кое треба да се искалат и да си ги истресат страстите. Тоа е прашање на безбедност од различни агли“, изјави Велиќ.

Овојпат сè е на видео: опис на жените, цена за мажите и писмо-покана за виза. Дали институциите ќе стигнат да проверат што стои зад тоа пред некоја од средбите да заврши лошо, а не откако ќе стане вест?