Петмина малолетници со тврди предмети претепале момче пред училиште во Рашче: кој ги чува училишните врати?

Околу 9:40 наутро, на 11 ноември, пред влезот на основното училиште во скопското село Рашче, пет малолетници го дочекале својот врсник. Го тепале и со тврди предмети. Момчето завршило со тешки телесни повреди.

Нападот го пријавила мајката, 37-годишна жена од Рашче, следниот ден во СВР Скопје. Од МВР ја повторуваат познатата реченица: се преземаат мерки за расчистување на случајот. Петмина на еден, наутро, пред школска врата – а сторителите засега не се соопштени.

Само неколку часа подоцна, околу 12:30, во двор на основно училиште во реонот на Бит Пазар се случил уште еден напад. Според пријавата на 45-годишниот татко, една жена го фатила неговото малолетно дете за рацете, а нејзиниот малолетен син го удрил со тврд предмет. Ако ова се потврди, веќе не зборуваме само за деца што не знаат граница. Зборуваме за возрасна личност која држела туѓо дете додека нејзиното го удира.

Двата случаја стигнуваат само неколку дена откако Основниот кривичен суд Скопје ја донесе првостепената пресуда за бруталното малтретирање на 13-годишно девојче во Ѓорче Петров, кое во март ја згрози јавноста. Четирите малолетнички добија заводска воспитна мерка, упатување во воспитно-поправен дом: две по една година, две по осум месеци. Одлуката не е правосилна. Против нивните родители беа поднесени и шест кривични пријави за запуштање и малтретирање дете.

Пресудата е порака, но порака што пристигнува откако некое дете веќе е претепано. Кој ги гледа училишните влезови во часовите кога учениците влегуваат? Каде се училишните психолози и педагози пред случајот да стигне до полициски билтен?

Полицијата работи на расчистување. Дотогаш, во Рашче има едно тешко повредено момче и родители кои во понеделник повторно ќе ги испратат децата на училиште.