Skip to content

Лавров: Русија ја истиснуваат од српскиот НИС – а Белград останува заглавен меѓу Москва и Вашингтон

1 мин. читање
Сподели
Лавров: Русија ја истиснуваат од српскиот НИС – а Белград останува заглавен меѓу Москва и Вашингтон

Руската дипломатија има нова жалба. Министерот за надворешни работи Сергеј Лавров изјави дека Русија постепено ја истиснуваат од Нафтената индустрија на Србија (НИС), но и од сите светски енергетски пазари. Тоа го кажа во интервју за руската агенција ТАСС и телевизијата ВГТРК.

„Американците гордо објавија дека венецуелската нафта сега е под нивна контрола, а не под контрола на Кина и Русија, иако ние таму ништо не контролиравме, туку бевме партнери. Нè истиснуваат оттаму, нè истиснуваат од сите енергетски пазари“, рече Лавров.

Според него, САД водат политика чија цел е доминација на глобалниот енергетски пазар, а како пример го наведе НИС, каде главен акционер е рускиот „Газпром њефт“. „Доктрината на доминација на глобалниот енергетски пазар е усвоена и сега се спроведува. Нафтената индустрија на Србија минува низ реструктурирање. И оттаму нè истиснуваат“, изјави шефот на руската дипломатија.

Москва зборува како жртва на пазарот, а токму мнозинската руска сопственост е причината поради која НИС е под американски санкции веќе повеќе од една година. Оттогаш Вашингтон секој месец ја продолжува лиценцата на компанијата за работа, а со неа и рокот за преговорите меѓу унгарскиот МОЛ и рускиот сопственик. На 30 октомври НИС соопшти дека американската Канцеларија за контрола на странски средства (OFAC) ја продолжила оперативната лиценца до 11 декември.

Што всушност се случува со продажбата, секој кажува поинаку. Магазинот Forbes на 1 октомври пишуваше дека преговорите „практично пропаднале“, а од МОЛ веднаш демантираа за BBC. На 20 октомври српскиот министер за финансии Синиша Мали тврдеше дека „работата е многу едноставна“, дека руската и унгарската страна „постигнале договор“ и дека „договорот е потпишан“. Остануваше, според него, „уште една работа“: согласноста од телата за заштита на конкуренцијата во Србија и во други држави, меѓу кои и OFAC при американското Министерство за финансии.

МОЛ го демантираше и тоа. „Нема нови елементи ниту поместувања во преговорите поради кои би имале потреба да ги известиме финансиските пазари“, порачаа од компанијата.

Така српската нафтена компанија живее од рок до рок, на американска дозвола: Москва се жали, Будимпешта демантира, а Белград објавува договори што другите не ги потврдуваат. Балканот ја знае оваа сцена напамет – кога големите се караат околу енергија, малите држави чекаат туѓ потпис. Колку уште декемвриски рокови може да издржи една компанија пред некој да мора да избере страна?