Skip to content

Масакрот во „Рибникар“: Коста К. догодина полни 18, а Србија сè уште нема каде да го смести

1 мин. читање
Сподели
Масакрот во „Рибникар“: Коста К. догодина полни 18, а Србија сè уште нема каде да го смести

Три и пол години по масакрот во белградското основно училиште „Владислав Рибникар“, Србија сè уште нема одговор на прашање чиј датум го знае од првиот ден. Коста К., кој на 3 мај 2023 година уби девет ученици и еден чувар и рани уште шест луѓе, следното лето полни 18 години. Тогаш повеќе не може да остане на детската психијатрија. Каде оди потоа – никој не кажува.

Прашањето повторно го отвори Нинела Радичевиќ, мајката на убиената Ана Божовиќ. „Главното прашање за која било власт што сега е на тоа место е дали државата донела некаков закон, затоа што ние веќе три и пол години немаме решение што да се прави со него. Не постои трајно сместување за ваков вид сторител. Што се работи на тоа?“, праша таа.

Клиниката ја испразнија, него го оставија

Од денот на масакрот Коста К. е сместен во Клиниката за неврологија и психијатрија за деца и млади во Белград. Деновиве од таа клиника беа преместени сите други пациенти, бидејќи зградата е оштетена: дефект на водоводните цевки, оштетен дел од темелите и слегнување на теренот. Одлуката ја донела директорката врз основа на проценка за безбедноста на објектот, соопшти српското Министерство за здравство, кое потоа нареди итни мерки за заштита на пациентите.

Само еден пациент остана во зградата што не е безбедна за другите. „Ако се тврди дека безбедноста на таа болница е трајно нарушена и дека едноставно не е безбедна, што ќе биде со Коста? Како одеднаш тоа не е никаков проблем?“, праша Радичевиќ. Прашање што требаше да го постави Министерството, а не мајката на убиено дете.

Новата власт одговори со една реченица

Бидејќи по изборите на 25 октомври во Србија власта се менува, прашањето стигна и до Студентската листа, победниците на изборите. Одговорот: „Ова е многу важно прашање, со кое ќе се занимаваат надлежните институции кога ќе ги ослободиме, по формирањето на Владата.“ Важно прашање, без збор за решение.

Радичевиќ веќе го гледа сценариото што Балканот го знае напамет. „Новата власт ќе ја обвинува старата. Старата власт ќе каже: „Не знам јас, прашајте ги оние за кои гласавте на 25 октомври.“ Нешто не ми се допаѓа во целата оваа приказна“, рече таа, додавајќи дека по три и пол години живот со оваа рана е многу скептична кон сè.

Три и пол години без закон

Коста К. на денот на масакрот имал 13 години, помалку од два месеци до 14-тиот роденден. Според српскиот закон, под 14 години не може да одговара кривично, па по злосторството е сместен во психијатриска установа. Најавуваните законски измени не донесоа ништо формално: неговиот долгорочен статус сè уште не е решен.

Семејствата на жртвите веќе една година чекаат Апелациониот суд да одлучи во граѓанската постапка против родителите на момчето. Од пресудата во кривичната постапка во мај до ноември, според мајката, нема никакво поместување. „Како „Рибникар“ веќе никого да не го интересира. Навистина е потполна тишина“, вели таа.

Ова не е прашање што дојде ненадејно. Државата знаеше точно кога момчето ќе стане полнолетно уште во мај 2023 година. Ако за три и пол години не се нашло време за еден закон, колку ли ќе чекаат семејствата додека новата Влада ги „ослободи“ институциите?