Jolevski merr Prokurorinë e Lartë në Manastir - katër vjet pasi vetë e propozoi të dyshuarin Vezirovski

Në Prokurorinë e Lartë Publike Manastir ndryshoi shefi, por jo njerëzit rreth të cilëve sillet historia. Këshilli i Prokurorëve Publikë në seancën e së martës e emëroi Antonio Jolevskin ushtrues detyre të prokurorit të lartë publik, në vend të Peco Vezirovskit - prokurorit kundër të cilit PPP për ndjekjen e krimit të organizuar dhe korrupsionit më 7 tetor nisi procedurë për pranim shpërblimi për ndikim të kundërligjshëm.

Vendimi erdhi pasi Gjykata Themelore Penale Shkup e njoftoi Këshillin se ndaj Vezirovskit është caktuar masë paraprake: ndalim për të kryer punët në vendin e tij të punës. Këshilli e shfuqizoi vendimin me të cilin ai ishte u.d. udhëheqës dhe në vend të tij e vendosi Jolevskin.

Për çfarë dyshohet Vezirovski. Sipas prokurorisë, me masa të posaçme hetimore janë siguruar prova se ai e ka përdorur ndikimin e tij real dhe pozitën zyrtare për të ndikuar te kolegë prokurorë dhe gjyqtarë në së paku katër lëndë të veçanta - për dënime më të ulëta ose pozitë më të favorshme për të dyshuarit dhe të akuzuarit. Emri i tij në publik u përmend edhe në lidhje me kthimin e pasaportës së biznesmenit Borçe Markovski, pronar i „Markovski Kompani“, i akuzuar për keqpërdorime gjatë një prokurimi publik në REK „Manastir“.

E kush është i riu. Jolevski është prokuror shumëvjeçar, ish-udhëheqës i Prokurorisë Themelore Publike Manastir dhe kryetar i Këshillit të Prokurorëve Publikë nga viti 2021 deri në 2023. Pikërisht si kryetar i atij Këshilli, në vitin 2022, ai e propozoi Vezirovskin për u.d. udhëheqës të Prokurorisë së Lartë në Manastir. Katër vjet më vonë - e trashëgon.

Mandatin e tij në Këshill e shënoi edhe rasti me prokuroren Lençe Ristoska. Në dhjetor të vitit 2023 Komisioni për Parandalim dhe Mbrojtje nga Diskriminimi konstatoi diskriminim të drejtpërdrejtë të vazhdueshëm nga ana e Këshillit gjatë avancimit të saj profesional. Jolevski e kontestoi atë mendim para Gjykatës Administrative, e cila në korrik 2024 e refuzoi padinë e tij. Në tetor 2024 ai u zgjodh prokuror pikërisht në Prokurorinë e Lartë Manastir.

Asgjë nga këto nuk do të thotë se Jolevski ka bërë diçka të paligjshme. Por sistemi që duhet ta rikthejë besimin te prokuroria i përgjigjet skandalit me njeriun që para katër vjetësh e propozoi të dyshuarin për atë funksion. Kush në Këshill u pyet nëse kjo është zgjedhja më e mirë? Dhe a nuk ka vërtet drejtësia emër tjetër përveç atyre që me vite rrotullohen nëpër kolltukët e saj?