MPB ende nuk e di si Iva Mihailova e ka lëshuar shtetin, ndërsa Bullgaria zyrtarisht nuk e kërkon

Iva Mihailova është e akuzuar për një aksident trafiku në të cilin vdiq një njeri, ndërsa tre u lënduan. Gjykata në Koçan i caktoi paraburgim 30-ditor, MPB shpalli fletarrestim qendror dhe ndërkombëtar, ndërsa të dyja pasaportat e saj - maqedonase dhe bullgare - ishin marrë që më parë, pikërisht që të mos mund ta lëshonte shtetin. Ajo megjithatë e lëshoi. Dhe sot askush në institucionet maqedonase nuk mund të thotë si.

MPB ende po konstaton nëse Mihailova fare ka dalë përmes një vendkalimi legal kufitar. Sipas Ministrisë, nuk është evidentuar dalje e saj legale nga Maqedonia, as hyrje legale në Bullgari - e njëjta vlen edhe për avokatin Nikollaj Dimitrov, i cili pohonte se e ka shoqëruar. Vetë Mihailova për televizionin bullgar BTV deklaroi se u largua për shkak të gjendjes së përkeqësuar shëndetësore, „me dokumentet e mia për identifikim personal“. Rastin e verifikon Sektori për Kontroll të Brendshëm.

Sofja u përgjigj me Kushtetutën. MPB bullgare njoftoi se më 13 tetor në orën 19:38 ka marrë mesazh nga Interpol-Shkupi me kërkesë për kërkim, arrestim dhe ekstradim. Por, siç theksojnë, fletarrestim i kuq i Interpolit deri tani nuk ka, ndërsa autoritetet bullgare nuk kanë ndërmarrë asnjë hap për ta lokalizuar në territorin e tyre. Pastaj citojnë nenin 25 të Kushtetutës bullgare, sipas të cilit shtetasi bullgar ekstradohet vetëm nëse këtë e parasheh një marrëveshje ndërkombëtare e ratifikuar, si dhe Konventën Evropiane për Ekstradim, e cila lejon që një shtet të refuzojë dorëzimin e shtetasit të vet.

Ministria e Drejtësisë, nga ana e saj, pret njoftim zyrtar nga MPB se Mihailova është lokalizuar ose arrestuar, që të mund të nisë fare procedurën për ekstradim. Pra, rrethi është mbyllur: Shkupi pret që Sofja ta gjejë, Sofja thotë se nuk e kërkon.

Ministri i Shëndetësisë Sasho Klekovski pohon se arratisja ndodhi pikërisht para se të mbërrinte konziliumi mjekësor bullgar, i cili, sipas tij, shpejt do të tregonte se nuk ka arsye mjekësore për mjekim jashtë vendit. Ministri i Punëve të Brendshme, ndërkaq, paralajmëroi se „ndoshta duhet të mendohet“ për ndryshime në masat e kujdesit për personat me shtetësi të dyfishtë - që përveç pasaportave t'u merren edhe letërnjoftimet.

Skena politike, siç pritej, u shndërrua në garë për hedhjen e fajit. VMRO-DPMNE pyet nëse Filipçe dhe Zaevi u kanë premtuar bashkëpunëtorëve të Rumen Radevit raport mjekësor për mjekim në Bullgari. LSDM kundërpërgjigjet se „kufiri është djathë zviceran“ dhe kujton se MPB-në e udhëheq Pançe Toshkovski, ndërsa Qeverinë Hristijan Mickoski.

Ping-pongu partiak nuk i përgjigjet pyetjes themelore. Nëse një person me pasaporta të marra dhe me procedurë gjyqësore mund ta kalojë kufirin pa gjurmë në evidencë, kush tjetër mundet? Dhe kush do t'i japë llogari familjes së të ndjerit?