Nga sanksionet në Mar-a-Lago: Dodiku gjoja shkon në galën MAGA te Trampi, ndërsa rrugën e pagoi Republika Srpska me miliona për lobistë

Para katër vjetësh Uashingtoni e vendoste në listën e sanksioneve. Javën tjetër, nëse informacionet konfirmohen, Milorad Dodiku do të shëtisë nëpër Mar-a-Lago.

Ish-presidenti i Republikës Srpska, sipas një reviste të respektuar amerikane që thirret në disa burime të njohura me planet e tij, pritet të marrë pjesë në tubimin CPAC Circle Retreat and Gala, nga 4 deri më 7 nëntor, në rezidencën e Donald Trampit në Florida. Atje Unioni Konservator Amerikan mbledh anëtarë të administratës së Trampit, senatorë republikanë dhe donatorë për të folur për rezultatet e zgjedhjeve për Kongres të 3 nëntorit dhe për zgjedhjet presidenciale të vitit 2028.

Ende asgjë nuk është konfirmuar. Burimet paralajmërojnë se detajet mund të ndryshojnë, zyra e Dodikut nuk u përgjigj, ndërsa shefi i Unionit, Mett Shlap, nuk dëshiron ta konfirmojë ardhjen e tij: do të ketë një grup interesant donatorësh dhe të ftuar të rëndësishëm, por emrat e atyre që nuk janë folës nuk do të publikohen. Nëse Trampi do të jetë fare atje, gjithashtu nuk dihet. Një galë me listë që askush nuk dëshiron ta tregojë - kjo thotë mjaftueshëm për çfarë lloj të ftuarish bëhet fjalë.

Çmimi i imazhit të ri

Rruga nga sanksionet në Florida nuk kalohet falas. Sipas revistës, kthimi i Dodikut në rrethet e afërta me Trampin është rezultat i një fushate të gjerë lobimi, të paguar me miliona dollarë që autoritetet e Republikës Srpska i shpenzuan pas kthimit të Trampit në Shtëpinë e Bardhë. Qëllimi ishte që Dodiku në Uashington të pushonte së qeni njeri nën sanksione dhe të bëhej politikan i përndjekur padrejtësisht dhe mbrojtës i vlerave të krishtera.

Emrat në listën e pagave tingëllojnë si lista e të ftuarve të vetë Trampit. Për Dodikun dhe bashkëpunëtorët e tij punuan ish-avokati personal i Trampit, Rudi Xhuliani, dhe ish-guvernatori i Ilinoisit, Rod Blagojeviq, të cilin Trampi e fali. U angazhua edhe firma ku punon Kejti Uajls, e bija e shefes së kabinetit të Shtëpisë së Bardhë, Suzi Uajls. Dhe para zgjedhjeve të këtij viti në Bosnje e Hercegovinë, Qeveria e Republikës Srpska angazhoi edhe Xhejms Blerin dhe Kris LaCivitën, dy këshilltarë të rëndësishëm politikë të Trampit. Kur puna doli në publik dhe Trampi i kritikoi në Truth Social, ata i dhuruan honoraret për fondin e bibliotekës së tij presidenciale.

Dodiku nuk e fshehu për çfarë bëhej fjalë. „Sikur të mos ishte fitorja madhështore e Donald Trampit, sot ndoshta do të ishim kufoma politike“, u tha ai përkrahësve të tij pas suksesit të partisë së tij në zgjedhje. Falënderime i dërgoi edhe Vladimir Putinit, të cilin së fundi e quajti një nga liderët më paqedashës të kohës sonë.

Nga lista e zezë në Florida

Administrata e Xho Bajdenit e sanksionoi në vitin 2022 për korrupsion dhe minim të Marrëveshjes së Paqes së Dejtonit, përpjekje për krijimin e institucioneve paralele dhe nxitje të ndarjeve etnike dhe fetare. Sanksionet më pas u zgjeruan te familja, bashkëpunëtorët dhe firmat e lidhura me ta. Vitin e kaluar u dënua me vendim të formës së prerë për mosrespektim të vendimeve të përfaqësuesit të lartë për BeH, humbi postin e presidentit të Republikës Srpska dhe mori ndalim gjashtëvjeçar për ushtrimin e funksioneve publike. Aktgjykimin e hedh poshtë si të motivuar politikisht.

Pastaj erdhi tetori i vitit 2025: administrata e Trampit ia hoqi sanksionet, ndërsa zyra amerikane për kontrollin e mjeteve të huaja nuk e arsyetoi publikisht vendimin. Sipas revistës, funksionarë të administratës kërkuan edhe largimin e përfaqësuesit të lartë Kristian Shmit, i cili për vite ishte në konflikt me Dodikun. Shmiti e la detyrën në maj të këtij viti dhe më vonë deklaroi se kishte qenë nën presion të madh dhe të papritur nga SHBA-ja.

Diplomatë dhe analistë frikësohen se ndryshimi i qëndrimit amerikan do t'i inkurajojë edhe më shumë planet e tij separatiste dhe do ta rrezikojë stabilitetin e BeH-së. Funksionarë aktualë dhe të mëparshëm amerikanë paralajmërojnë se Dodiku mund të përpiqet t'i arrijë qëllimet e tij derisa Trampi është në pushtet, duke ditur se një administratë eventuale demokrate pas vitit 2028 do të ishte më pak lëshuese.

Ballkani për dekada mëson të presë: në sportelet e Brukselit, nëpër korridoret e Uashingtonit, me reforma, strategji dhe raporte progresi. Një njeri me aktgjykim të formës së prerë dhe ndalim funksionesh tani, nëse burimet janë të sakta, po përgatitet për një galë në Florida. Del vallë se rruga më e shpejtë drejt Perëndimit nuk kalon përmes reformave, por përmes lobistit të duhur?