I akuzuar për dëm të supozuar prej 9,7 milionë eurosh, i pritur me pishtarë dhe bomba tymuese: Grubi doli nga arresti shtëpiak, avokatët u kërkojnë falje qytetarëve

Ish-zëvendëskryeministri i parë Artan Grubi për më shumë se 14 muaj ishte i paarritshëm për drejtësinë maqedonase. Të martën mbrëma, kur doli nga arresti shtëpiak, në Çairin e Shkupit e pritën pishtarë, bomba tymuese dhe fishekzjarrë. Incizimet brenda pak orësh qarkulluan nëpër rrjetet sociale - e në disa prej tyre Grubi shihet duke qëndruar në një lokal hotelierik me një grup më të madh njerëzish.

Të nesërmen avokatët e tij u distancuan. Tubimi, thonë ata, ishte „spontan, para shtëpisë së Artan Grubit, pa fjalime, pa mesazhe dhe pa simbole politike“, Grubi nuk mori pjesë në organizim, ndërsa mbrojtja „u kërkon falje të gjithë qytetarëve që mund të jenë shqetësuar“ nga „ngjarja spontane disaminutëshe“. Spontane, pra - por me piroteknikë të përgatitur.

Pse është i lirë. Gjykata Penale e shfuqizoi masën sepse skadoi afati maksimal prej 60 ditësh pas paraqitjes së propozim-aktakuzës, i paraparë me Ligjin për procedurë penale. Kjo nuk është lirim nga akuza. Gjykata e refuzoi kërkesën për kthimin e pasaportës, pavarësisht garancisë së ofruar në pronë të paluajtshme prej 335.707 eurosh. Grubi nuk guxon ta lëshojë vendbanimin, ka detyrim të paraqitet herë pas here në gjykatë dhe ndalim kontakti me persona të caktuar.

Ai është i akuzuari i dytë në lëndën „Lotaria Shtetërore“ për keqpërdorim të pozitës zyrtare. Sipas aktakuzës, në vitet 2023 dhe 2024, gjatë prokurimit të terminaleve të videolotarisë dhe aranzhimeve për lojëra elektronike të fatit, kompanisë shtetërore i është shkaktuar dëm prej 596.125.511 denarësh, përkatësisht rreth 9,7 milionë euro. Përveç tij, të akuzuar janë edhe ish-drejtori Përparim Bajrami dhe gjashtë persona të tjerë. Grubi në seanca deklaroi se nuk ndihet fajtor. Gjykimi nisi më 24 gusht.

Historia e tij me drejtësinë edhe deri tani ka qenë gjithçka, vetëm jo e zakonshme. Pas arratisjes në Kosovë, më 23 shkurt 2026 u dorëzua në vendkalimin kufitar të Bllacës. Në vend të paraburgimit, pas disa orësh në burgun e Shutkës u transferua në arrest shtëpiak - prokuroria atëherë përmendi njohuri operative se siguria e tij dhe e familjes së tij do të rrezikohej seriozisht në Burgun Hetues.

Reagimet politike nuk vonuan. VLEN e quajti pritjen teatër politik dhe pyeti „Ku është pishtari i Ahmetit për Grubin?“, duke pohuar se lideri i BDI-së dëshiron ta paraqesë zëvendësimin e paraburgimit si meritë personale.

Gjykata e respektoi afatin ligjor dhe kjo nuk është për t'u qortuar. Pyetja është tjetër: çfarë mesazhi dërgon shteti kur një i akuzuar për dëm prej gati dhjetë milionë eurosh, i cili më parë i ka ikur drejtësisë, kthehet në shtëpi nën piroteknikë - e reagimi i vetëm është falja e avokatëve? A do të verifikojë policia të paktën kush i ndezi pishtarët në mes të një vendbanimi?