Pesë në garë për shef të Prokurorisë për Krim të Organizuar: të gjithë premtojnë pavarësi, askush nuk tha nga do të vijnë paratë dhe kuadri

Prokuroria për ndjekjen e krimit të organizuar dhe korrupsionit (OJO GOKK) merr shef të ri, ndërsa zgjedhja për herë të parë është në duart e vetë prokurorëve. Më 28 tetor, nga ora 8 deri në 16, 188 prokurorë publikë nga i gjithë shteti me votim të fshehtë dhe të drejtpërdrejtë do të zgjedhin pasardhësin e Islam Abazit. Kjo është risia nga ndryshimet e Ligjit për prokurorinë publike.

Kandidatët janë pesë: Faton Azizi dhe Iskra Haxhi-Vasileva nga OJO GOKK, Trajçe Pelivanov dhe Jovan Cvetanovski nga Prokuroria e Lartë Publike Shkup dhe Lidija Raiçeviq nga Prokuroria Themelore Publike Shkup. Ata i prezantuan programet e tyre para Këshillit të prokurorëve publikë, në transmetim të drejtpërdrejtë.

Programet i ngjajnë njëri-tjetrit

Azizi, i cili punon në Repartin për ndjekjen e korrupsionit të lartë dhe i udhëheq lëndët „Botoks“ dhe „Aditivët“, kërkon qendër hetimore më të fortë, kuadro të reja për krim ekonomik dhe forenzikë digjitale, si dhe qasje të drejtpërdrejtë në bazat e të dhënave të MPB-së dhe DAP-it. „Nuk ka të dyshuar të madh e të vogël“, deklaroi ai. Pelivanov, ish-prokuror në Prokurorinë Speciale Publike (PSP) të shuar dhe ish-zëvendës i shefit të OJO GOKK, foli më së shumti për pavarësinë: „Akuza e fortë nuk është ajo që paralajmërohet me zë të lartë, por ajo që ndërton hetime cilësore që do ta kalojnë testin para gjykatës.“

Haxhi-Vasileva, e cila e udhëheq rastin kundër gjykatësit Gjoko Ristov, propozoi katër shtylla - azhurnim, hetime financiare, digjitalizim dhe transparencë - si dhe zbatim më të shpeshtë të marrëveshjes për pranim të fajit. Cvetanovski propozoi protokoll se kur prokuroria do të kërkojë paraburgim e kur masë më të butë, si dhe publikim të vendimeve prokuroriale.

Paraqitjen më të mprehtë e pati Raiçeviq, e vetmja që nuk dorëzoi program. Në vend të programit, tha ajo, prokurorisë i nevojiten ekspertizë dhe proaktivitet: prokurorët ta zbulojnë krimin, e jo vetëm të presin kallëzime policore. Ajo foli hapur edhe për „patologjinë“ kur një kandidat i caktuar telefonon nëpër gjithë Maqedoninë për të mbledhur vota.

Çfarë mbeti e pathënë

Të gjithë premtojnë më shumë hetime financiare dhe qendër hetimore më të fortë. Por asnjë nga kandidatët nuk tha si do të sigurohen më shumë para dhe njerëz, nëse pushteti është kundër rritjes së buxhetit të prokurorive. Pa këtë përgjigje, programet mbeten listë dëshirash.

Në seancë nuk u pyet as për aktakuzën e ngritur kundër Cvetanovskit, e cila ende nuk është vlerësuar. Ai thotë se kjo nuk është pengesë për kandidaturën e tij. Prokurori Publik i Republikës, Nenad Saveski, nga ana tjetër, secilit kandidat i bëri nga një pyetje, ndërsa veçanërisht e interesonte nëse programet e mbajnë logon e prokurorisë që ai e promovoi pasi e mori funksionin.

Prokurorinë që duhet t'i ndjekë më të fuqishmit do ta udhëheqë njeriu që prokurorët do ta zgjedhin vetë. Nëse do të votojnë sipas ndërgjegjes apo sipas thirrjes telefonike, do të shihet më 28 tetor - dhe pastaj, në lëndën e parë të madhe.