Mickoski u porositi marketeve: ulni çmimet ose do t'ju publikojmë

Kryeministri Hristijan Mickoski u porositi marketeve - ulni çmimet ose Qeveria do të reagojë. Sipas paralajmërimit të tij, me zinxhirët tregtarë po bisedohet që inflacioni dhe çmimet e produkteve bazë të mbeten nën 3 për qind, e në të kundërt hapet mundësia që emrat e atyre që nuk i përmbahen të publikohen.

Njëkohësisht, çmimi i naftës ra për 7 denarë, dhe u lirua edhe benzina - një hap që Qeveria e paraqet si pjesë të të njëjtit përpjekje për një jetë të përditshme më të lirë. Mesazhi është i qartë: shteti tani ulet në tryezë me tregtarët dhe negocion se sa do të kushtojnë buka, qumështi dhe vaji.

Ideja tingëllon mirë për këdo që mbush shportën me pagë të zvogëluar. Por vlen të kujtohet - kjo nuk është hera e parë. „Është turp çfarë bëjnë tregtarët", dëgjohej edhe para festave vitin e kaluar, me kërcënime për inspeksione dhe marzhe. Çmimet sërish u rritën. Një marrëveshje mes qeverisë dhe marketeve për inflacion „nën 3 për qind" është e lehtë të paralajmërohet, më e vështirë të mbahet kur askush nuk shikon.

Pyetja që çdo blerës e mbart te arka është e thjeshtë: a do të duket marrëveshja këtë herë në etiketë, apo sërish vetëm në komunikatë? Sepse inflacioni nuk shfuqizohet me konferencë shtypi. Ai matet në raft - e pikërisht aty, e jo te premtimet, qytetarët do të shohin nëse „marrëveshja" do të thotë diçka.