Edhe Gjykata Supreme i tha jo Stojançe Jovanovskit: Mbeten 12 vjet burg për dhunën ndaj bashkëshortes Ivana

Stojançe Jovanovski e shteroi edhe mjetin e jashtëzakonshëm juridik. Gjykata Supreme në seancën e 21 tetorit e refuzoi si të pabazuar kërkesën për rishqyrtim të jashtëzakonshëm të aktgjykimit të plotfuqishëm, kështu që dënimi unik prej 12 vjetësh burg mbetet në fuqi.

Jovanovski është dënuar me aktgjykim të plotfuqishëm për lëndim trupor, rrezikim të sigurisë dhe nxitje e ndihmë në vetëvrasje. Lënda ka të bëjë me dhunën që ai ushtronte ndaj bashkëshortes së tij Ivana. Ajo dhe vajza e tyre gjashtëvjeçare e humbën jetën më 2 mars të këtij viti në lagjen e Shkupit Taftalixhe.

Gjykata Themelore Penale e mori aktgjykimin më 7 maj, Apeli e vërtetoi më 18 qershor, ndërsa Gjykata Supreme vendosi më 21 tetor. Të tri vendimet erdhën për më pak se tetë muaj pas 2 marsit. Gjykata në njoftim nuk e përmend me emër të dënuarin, por numrat dhe datat e lëndëve përputhen me rastin e Jovanovskit. Arsyet e refuzimit nuk janë paraqitur, ndërsa aktgjykimi duhet të publikohet në faqen e internetit të gjykatës.

Gjykatat thanë kush është fajtor dhe për çfarë. Nuk thanë nëse dikush mund ta ndalte dhunën para 2 marsit. Kjo pyetje u takon institucioneve që ekzistojnë pikërisht për gratë në një pozitë të tillë, dhe mbetet e hapur.