Vuçiq i tha Sobçakut se Putini nuk blefon me armët bërthamore, ndërsa për goditje ndaj Evropës: „Mendoj se do. Nuk do ta bëjë“

Aleksandar Vuçiq, i cili tani është kandidat për kryeministër të Serbisë, në një intervistë për gazetaren ruse Ksenia Sobçak deklaroi se Vladimir Putini „nuk blefon fare“. Nëse Rusia sulmohet drejtpërdrejt - nga SHBA-ja, nga Evropa apo nga Britania e Madhe - përgjigjja bërthamore, sipas Vuçiqit, do të vijë në të njëjtin moment. Liderët perëndimorë, thotë ai, bëjnë gabim të madh nëse mendojnë ndryshe.

„Kur filluan të flasin se Putini blefon me përdorimin e armëve bërthamore, të gjithëve në Perëndim u thashë: Putini nuk blefon fare. Ai me siguri nuk dëshiron t’i përdorë ashtu, pa arsye. Askush nuk është i çmendur. Por nëse vjen deri te një sulm i drejtpërdrejtë nga jashtë, nga Amerika, Evropa apo Britania, nga kush të doni, do të përgjigjet me armë bërthamore në të njëjtin moment“, deklaroi Vuçiq. Sipas tij, bashkëbiseduesit perëndimorë disa herë i hodhën poshtë paralajmërimet e tij me përgjigjen: „Jo, jo, ai blefon.“

Vuçiq precizoi se flet për një situatë në të cilën Rusia sulmohet drejtpërdrejt dhe duhet ta mbrojë territorin e vet, e jo për përdorim arbitrar të armëve bërthamore. Shtoi se të njëjtin paralajmërim e përsërit edhe sot, sepse shumë në Perëndim besojnë se Aleanca është më e fortë se Rusia dhe se kurrë nuk do të arrihet deri aty. „Nëse vërtet mendoni se nuk do t’i përdorë në asnjë kusht, ky është gabim i madh“, tha ai.

Përgjigje që e kundërshton veten

Pastaj Sobçak e hapi pyetjen më konkrete. Ajo përmendi tezën e politologut rus Sergej Karaganov: që Rusia të kryejë një goditje bërthamore parandaluese ndaj fabrikave evropiane që prodhojnë armë për Ukrainën, pa rrezik nga një përgjigje bërthamore amerikane - dhe kështu ta përfundojë shpejt luftën. Vuçiq e hodhi poshtë këtë mundësi kështu: „Nuk mendoj se Putini do ta bëjë këtë. Pse? Nuk e di pse... Mendoj se do. Nuk do ta bëjë. Sepse Putini dëshiron të tregojë se këtë do ta bëjë vetëm në një situatë të jashtëzakonshme.“

Njeriu që pretendon se i kupton qëllimet e Putinit më mirë se liderët perëndimorë, në pyetjen për një goditje bërthamore ndaj Evropës u përgjigj me „mendoj se do“ dhe „nuk do“ në dy fjali të njëpasnjëshme. Përfundimi i tij, megjithatë, është se Putini armët bërthamore nuk i sheh si armë për fitore paraprakisht, por vetëm si përgjigje në një situatë të vështirë - „pasojë e veprimeve të dikujt“.

Serbia është kandidate për anëtarësim në Bashkimin Evropian, ndërsa politikani i saj më i fuqishëm, tani edhe kandidat për kryeministër, shpjegon doktrinë bërthamore në një intervistë për një gazetare ruse. A është ky mesazh për Brukselin, për Moskën apo për votuesit në shtëpi? Ndoshta për të gjithë njëherësh - mjeshtëri që në Ballkan e njohim shumë mirë.