Zjarri që tri ditë dogji në rrëzë të Pelisterit është vënë nën kontroll të plotë. Drejtori i Drejtorisë për Mbrojtje dhe Shpëtim, Stojançe Angelov, e quajti këtë „një nga sukseset më të mëdha të kësaj vere“ - shuarjen e një zjarri që lëvizte nëpër pyll pishe.

Por të njëjtën ditë, nga i njëjti zjarr, mbërritën dy versione të ndryshme për atë nëse ka të lënduar.

Dy deklarata, një zjarr

Drejtori i Parkut Kombëtar „Pelister“, Ivanço Toshevski, njoftoi se gjatë natës janë lënduar dy pjesëtarë të njësive që vepronin në terren dhe se gjendja e tyre shëndetësore është stabile. Angelov, nga ana e tij, i demantoi shprehimisht ato raportime: „Deri tani nuk është lënduar asnjë zjarrfikës. Nuk është i saktë lajmi që u shfaq në disa portale se ka dy zjarrfikës të lënduar.“

Të dy flasin për të njëjtën natë dhe për të njëjtat ekipe. Të dy drejtojnë institucione që morën pjesë në shuarje. Njëri prej tyre ishte në terren me njerëzit e vet. Kjo nuk është hollësi - nëse dikush u lëndua duke shuar malin, ai njeri ka emër dhe ka të drejtë që lëndimi i tij të evidentohet saktë.

Si u shua

Puna gjatë natës ishte përqendruar përgjatë kufirit mes Pyjeve Kombëtare dhe Parkut Kombëtar, në lartësi mbidetare mes 1.050 dhe 1.150 metrave, për të shfrytëzuar temperaturat më të ulëta të natës. Vepruan ekipet e PK Pelister, ZVZ „Arhangel“, njësia zjarrfikëse e REK Manastir dhe NTZ Resnjë, me mbështetjen e një helikopteri ushtarak dhe avionëve zjarrfikës.

„Në një moment e keni kontrollin e plotë, por me ndryshimin e parë të kushteve atmosferike gjërat ndryshojnë në po atë çast“, thotë Toshevski. Disa nga pjesëtarët e ekipeve qëndruan pa gjumë gati 48 orë.

Zjarri shpërtheu nga pemishtet në zonën e fshatit Makazi të Resnjës dhe lëvizte drejt Parkut Kombëtar.

Shtatë të tjerët

Ndërsa vëmendja ishte te Pelisteri, Qendra për Menaxhimin e Krizave regjistroi shtatë zjarre aktive në hapësirë të hapur nga gjithsej 17 të regjistruara. Digjet pyll i ulët te Radusha dhe Kopanica në Saraj, bimësi e ulët dhe drunj mbi Nezhilovë në Çashkë, pyll te Urviçi në Bogovinë dhe mes fshatrave Sellcë, Puhçe, Stepanci dhe Lakavicë në zonën e Shtipit. Aktivë janë edhe zjarret te Barbareva dhe Stiniku në Novo Sellë, te Bellica e Poshtme, Vishnja dhe Oktisi në Strugë, dhe te qendra e të dhënave në Prilep.

Nën kontroll janë zjarret në Gostivar dhe Makedonski Brod, në deponinë e qytetit në Dellçevë dhe mbi Paligradin në Zelenikovë.

Kryetari i Manastirit, Toni Konjanovski, dërgoi ekipe dhe mekanizëm të rëndë dhe bëri thirrje për sjellje të përgjegjshme në pyje. Thirrja është e saktë dhe është falas. Ajo që kushton është një natë në të cilën njerëz punojnë 48 orë pa gjumë sepse diçka u ndez në një pemishte.