Наградите „13 Ноември“ за 82 години слободно Скопје: Ѓорѓиевски ветува уреден, зелен и безбеден град

По повод 82 години од ослободувањето на Скопје, на свечена академија во Македонската опера и балет, градоначалникот Орце Ѓорѓиевски ги врачи годинашните награди „13 Ноември“.

Во публицистиката наградени се Леунора Калиќи, за долгогодишна работа во новинарството и публицистиката, и Огнен Марина, за делото „The Skopje Project“, посветено на истражувањето на обновата на Скопје. Наградата за образование и воспитание ја доби Факултетот за музичка уметност при Универзитетот „Св. Кирил и Методиј“, по повод 60 години од основањето. Признанија добија и Мирко Стефаноски, за придонес во културниот живот на Скопје, Марија Кичевска-Шокаровска, за долгогодишен придонес во балетската уметност, и група автори на учебниците „Превентивна стоматологија“ и „Детска стоматологија“.

За заштита и унапредување на животната средина наградена е компанијата „Мен енд маунтен“ ДОО Скопје, за хуманитарна активност Илија Кировски, во спортот пливачката Меланија Ќулавковска, а меѓу учениците и студентите Михаела Блажевска, за образовните достигнувања и за платформата „Learn.mk“.

Наградата има тежина. Меѓу досегашните добитници се Блаже Конески, во два наврати, Славко Јаневски, Симон Трпчески, Никола Мартиновски и Игор Стефановски – Иџе. Денот почна со положување цвеќе пред Споменикот на ослободителите на Скопје на Партизанските гробишта во Бутел, на гробот на генералот Михајло Апостолски и пред Споменикот на ослободителите пред Владата.

„Пред 82 години, на улиците на Скопје се решавало дали идните генерации ќе живеат со наведнати глави или ќе чекорат слободно“, рече Ѓорѓиевски. Како своја главна заложба ја посочи изградбата на уредно, зелено, безбедно и современо Скопје, во кое секое населено место ќе добива внимание.

Ослободителите својата обврска ја платија со животи. Од денешните власти се бара многу помалку: уредени улици, зеленило, безбедност. Четирите придавки од говорот се добар список. Следниот 13 Ноември е добар датум да се провери колку од нив преминале од говорот во градот.