„Очекувам, според анализата на берзите како се движеа минатата недела, да имаме поевтинување на дизелот и бензинот следна недела“, изјави премиерот Христијан Мицкоски при увидот на градилиштето на мостот на „Љубљанска“. Конечната одлука ја носи Регулаторната комисија за енергетика, а Владата, вели, паралелно преговара со „Окта“ за дополнителен попуст. Целта: „убедливо држава со најниска цена на горивото во регионот, а можеби и во Европа“.

Ниската цена има своја цена. Владата намали дел од акцизата, а ДДВ-то на дизелот е спуштено од 18 на 10 проценти. Претседателот на РКЕ Ацо Ристов пресметува дека без тие мерки дизелот денес би чинел 125 до 126 денари. Разликата ја чувствува буџетот: „Само по основ на акциза проценките се дека ќе недостигаат околу пет милијарди денари. Ако на тоа се додаде и стапката на данокот на додадена вредност, посебно за дизел горивото којашто е намалена, доаѓаме до бројка од 7-8 милијарди денари“, рече Мицкоски. Тоа, вели, не може да се покрие со прераспределба, па во текот на октомври следува формален ребаланс.

Истовремено, Владата одлучи да се задолжи нови 1,3 милијарди евра на меѓународните финансиски пазари, со образложение дека парите се потребни за раздолжување и за финансирање на буџетскиот дефицит. Опозицијата повторува дека со ваквите политики државата се турка во долгови.

Премиерот се обиде да ги смири и стравувањата за зимата. Термоблоковите во РЕК „Битола“ и „Осломеј“ ги завршуваат ремонтите, хидропотенцијалот е на околу 40 проценти, што го оцени како задоволително, а залихите и договорите со снабдувачите се обезбедени најмалку до Нова година. Како најголем зимски предизвик го посочи загадувањето, кога повторно ќе почне палењето дрва, масло, отпад, „некогаш и гуми“.

Поевтино гориво е добра вест на пумпата. Но кога истата влада во истиот месец прави ребаланс поради изгубени акцизи и се задолжува за 1,3 милијарди евра, вреди да се праша колку долго буџетот може да ја држи „најниската цена во регионот“ – и кој ќе ја плати разликата кога мерките ќе завршат?