Македонската филхармонија на 24 декември во 20 часот го одржува Гала-новогодишниот симфониски концерт „Три тенори“. Солисти се Благој Нацоски, Јосиф Џузепе Џипали и Кастриот Туша, а оркестарот го води италијанскиот диригент Атилио Томазело. Програмата е составена од популарни арии од класичната оперска литература.

Нацоски е роден во Скопје во 1979 година, а оперското деби го имаше во 2003 година во Римската опера, како Артуро во „Лучија ди Ламермур“. Оттогаш пеел на Салцбуршкиот фестивал, во Баварската државна опера во Минхен, во Цирих, Франкфурт и во венецијанската Ла Фениче, а во 2008 година Владата го прогласи за амбасадор на македонската култура.

Џипали, роден во Валона во Албанија, гостувал во Ла Скала, Ковент Гарден и Виенската државна опера и е познат како толкувач на Верди. Туша е роден во Елбасан во 1963 година и ги пеел главните улоги во „Травијата“, „Риголето“ и „Севилскиот берберин“ во националната опера во Тирана; во Албанија е познат и по изведбите на химната пред натпреварите на фудбалската репрезентација. Томазело бил прв капелмајстор на Дојче опер во Берлин.

Цените на билетите не се објавени на страницата на Филхармонијата; продажбата оди преку filharmonija.mk.