Утрово Белград се разбуди со столб црн чад над Нови Белград. Пожар избувна во трговскиот центар „Енјуб” на улицата Јуриј Гагарин, а на терен излегоа 40 пожарникари кои се борат да го изгаснат и да спречат да се прошири на соседните објекти.

Пожарникари со заштитна опрема и маски влегуваат во густиот чад, сечат делови од кровната конструкција и гаснат оган однатре. Според очевидци, огнот зафатил повеќе продавници, а најголем предизвик е кровот што продолжува да тлее и гори. Густиот чад се гледа од разни делови на градот, а сообраќајот во зоната е забавен.

Жителите на околните згради се предупредени да не отвораат прозорци поради чадот, а екипи на Брза помош се распоредени на лице место од претпазливост. Според официјалните информации, нема повредени – засега единствената добра вест во утро што многумина нема да го заборават лесно.

Пожарите во трговски центри се потсетник на нешто што Балканот предобро го знае: објекти полни со луѓе, а противпожарната заштита често е последното за кое некој мисли додека не загори. Среќа што овојпат немало никој внатре во вистинскиот момент. Но прашањето што останува виси над секој ваков пожар е истото – колку од овие згради, и кај нас и кај соседите, навистина ги исполнуваат стандардите за кои на хартија сите тврдат дека ги почитуваат?