Португалската кралска куќа добива нова членка, и таа доаѓа со презиме што влече траги низ половина Европа. Инфантот Динис, војводата од Порто (роден 1999 во Лисабон) се свршил со грофицата Ана Шафгоч, родена 2002 во Виена. Веридбата беше објавена на 29 јуни, а прстенот – со истакнат син сафир – неизбежно потсетува на оној на принцезата Дијана.

Ана не е само титула на хартија. Има дипломи по економија и општествени науки од Виена, дообука по управување со недвижнини и здравство, а моментално студира компаративно образование во Лондон додека волонтира во една португалска невладина организација. Зборува германски, англиски и италијански. Со други зборови – образована жена што сама гради биографија, а не само чека да ѝ ја напишат роднините.

А роднините ѝ се цела книга по историја. Династијата Шафгоч со векови им служела на Хабсбурзите и на пруската власт во Шлезија, собирајќи шуми, палати и бањи. По Втората светска војна, кога Шлезија премина кон Полска, семејството изгуби голем дел од имотот – остана им замокот Нидерлајс во Долна Австрија, ограбен за време на советската окупација, па обновен по 1955 година. Позната балканска приказна во австриско издание: моќ што војните ја кршат, а семејствата тврдоглаво ја враќаат парче по парче.

Датумот на свадбата сè уште не е познат – ќе биде објавен „кога ќе дојде време”. Португалската кралска куќа нема престол од 1910 година, но има нешто што ниту една револуција не го укинала – способноста да продолжи да прави свадби како да времето застанало. Прашањето е дали ваквите династички сврзувања сè уште значат нешто, или се само убаво спакувани спомени за Европа што одамна ги нема кралевите на власт.