Споменикот на децата бегалци повторно ја доби плочата: со години стоеше оголен, на неколку чекори од Собранието

Мајка со три мали деца, во бегство. Тоа е релјефот на споменикот на децата бегалци од Егејска Македонија во паркот „Жена борец“, на неколку чекори од Собранието. Со години, тој релјеф го немаше. Споменикот стоеше без плоча и без соодветно обележје, оголен од вандали.

Сега Град Скопје го реконструираше и му го врати првобитниот изглед. Градоначалникот Орце Ѓорѓиевски вели дека обновата е дел од враќањето на спомениците во главниот град во нивната првобитна состојба и од чувањето на историското наследство за идните генерации.

28.000 прекинати детства

Споменикот е откриен на 30 јуни 1988 година, на денот кога почна Првата светска средба на децата бегалци, која траеше до 4 јули и собра илјадници луѓе што како деца биле прогонети од домовите за време на Граѓанската војна во Грција, од 1946 до 1949 година. Според историските податоци за споменикот, станува збор за околу 28.000 деца, најголем дел Македонци, раселени низ земјите на Источна Европа и во прекуокеанските земји. Под бакарниот релјеф стоела и мермерна плоча што го одбележувала споменикот како траен паметник на прекинатото детство и егзодусот.

Обновата оди паралелно со целосно уредување на паркот: нови мермерни патеки наместо постојните плочки, хортикултура, реставрирана урбана опрема, нови клупи и корпи за отпадоци, како и скалите и деловите околу Градскиот трговски центар.

Добро е што плочата е вратена. Но непријатното прашање останува: како споменик на една од најтешките македонски трауми, во центарот на градот, спроти Собранието, можел со години да стои оштетен и да дојде на ред дури со реконструкцијата на паркот? Сеќавањето на 28.000 деца не би требало да чека реконструкција на цел парк. И кој ќе се погрижи релјефот да не исчезне повторно?