Молебен за Свети Еразмо Охридски за првпат во базиликата „Свети Петар“, а потоа и средба со патријархот Вартоломеј

Во базиликата „Свети Петар“ во Ватикан на 23 октомври за првпат беше отслужен молебен во чест на Свети Еразмо Охридски, на олтарот посветен на овој светител. Молебенот го отслужи митрополитот дебарско-кичевски Георгиј, во сослужение на протојереј-ставрофор Никола Христоски.

Присуствуваа Сања Митровска, вршител на должноста во македонската амбасада при Светата Столица, и Магдалена Димова, вршител на должноста во амбасадата во Италија, како и вработени во двете дипломатски претставништва и претставници на Дебарско-кичевската митрополија. Свети Еразмо е ранохристијански светител кој се поврзува со ширењето на христијанството во Охридскиот регион.

Средба што значи повеќе од протокол

Во Рим митрополитот Георгиј се сретна и со Вселенскиот патријарх Вартоломеј, кој престојуваше во италијанската престолнина по повод почесниот докторат по теологија што му беше доделен на Папскиот универзитет „Свети Тома Аквински“. Според Дебарско-кичевската епархија, средбата била можност за личен разговор „во духот на евангелската љубов и взаемното почитување“. Детали за содржината на разговорот не се соопштени.

Токму тоа молчење е интересно. Односите меѓу МПЦ-ОА и Вселенската патријаршија не се прекинати, но се во застој околу томосот за автокефалност што Македонската црква го очекува од Фанар. Архиепископот Стефан пред повеќе месеци изјави дека проблемот се барањата на Вселенската патријаршија: откажување од името Македонска православна црква, отстапување на црковните општини надвор од Македонија и признавање на Православната црква на Украина – што за МПЦ-ОА е неприфатливо.

Средбата доаѓа по августовската посета на епископот Антаниски Партениј на Света Гора и на чествувањето на Вселенската патријаршија на Имврос, во Турција. Знаци на зближување има. Прашањето е дали Фанар нуди разговор или бара отстапки – и дали МПЦ-ОА на крајот ќе мора да избира меѓу томосот и името.