Милорад Додик и Драшко Станивуковиќ некогаш заедно отворале проекти и зборувале за „соработка и синергија”. Денес си фрлаат навреди на социјалните мрежи како средношколци по скарување. Некогашни сојузници, сега непријатели – класична балканска политичка љубовна приказна.

Станивуковиќ првиот потегна: го нарече Додик „потрошен коцкар” кој „20 години се коцка со судбината на Република Српска и нејзините луѓе”. Во серија објави, градоначалникот на Бања Лука постави прашања за незавршени проекти и систематско уништување на јавни претпријатија: „Каде и да Додик закопа лопата, останаа лаги.”

Контранапад без кочници

Додик возврати со тешка артилерија: „Тој е обичен позер и кикотар, лажго и готован.” Го обвини за корупција, неправилно трошење на буџетот и лично богатење. Објави фотографија на Станивуковиќ со пораката: „Го препознавате ли овој ширит?” – алудирајќи на неисполнето ветување за градска болница.

Станивуковиќ одговори: „Изгледа ќе мораме да ги забраниме социјалните мрежи и за постарите луѓе, не само за децата под 15.” Ефектен контраудар – но ништо повеќе од уште едно поглавје во бескрајната серија.

Аналитичарите предупредуваат дека конфликтот има подлабоки димензии – борба за контрола на најголемиот град во Република Српска и идното политичко лидерство. „Линијата меѓу љубов и омраза е тенка ако стигнеш до точка каде сакаш да станеш поголем од Додик”, вели аналитичарката Тања Топиќ.

Пред избори, секој балкански политичар добива нов непријател. Обично токму оној со кого до вчера се прегрнуваше.