Policia dje në orën 9:30 e privoi nga liria 26-vjeçarin C.A., i cili kërkohej me fletarrest qendrore që më 6 gusht e lëshoi Gjykata Themelore Shkup 1 dhe me urdhër qendror kërkimi të SPB Shkup nga 17 prilli. Aksionin e kryen nëpunës të Sektorit për Bashkëpunim Ndërkombëtar Policor në koordinim me Njësinë e Policisë Intervenuese pranë SPB Shkup. Vendi i arrestimit: oborri i shtëpisë së tij.

Fletarresti është sipas nenit 258 paragrafi 1 në lidhje me nenin 22 të Kodit Penal, për zhvatje në bashkëkryerje, me masë të shqiptuar paraburgimi. Urdhri i kërkimit është për vepër penale sipas nenit 386 paragrafi 6, formë më e rëndë e dhunës, që ka të bëjë me rastet kur dhuna ka shkaktuar lëndim të rëndë trupor ose vdekje. C.A. iu dorëzua Stacionit Policor Gazi Babë për procedurë të mëtejshme.

Në kumtesë nuk ka asgjë për atë se ku ka qenë i dyshuari në pesë muajt e fundit. A ka qenë jashtë vendit, siç mund të sugjerojë përfshirja e Sektorit për Bashkëpunim Ndërkombëtar Policor, apo gjatë gjithë kohës ka qenë në adresën e vet? Nëse është e dyta, pesë muaj pritje është pyetje për policinë, jo për të dyshuarin.

Tani është në duart e drejtësisë. Nëse është fajtor për atë për çka kërkohet, do ta vërtetojë gjykata.