Erdhën t'ia kontrollonin armët, ndërsa ai i qëlloi: 60-vjeçari vrau dy nëpunës në një fshat bavarez

Një nëpunëse 54-vjeçare dhe kolegu i saj 45-vjeçar nga administrata e rrethit të Nojmarktit, në rajonin bavarez të Pfalcit të Epërm, më 8 tetor pasdite u nisën për një detyrë rutinë: të kontrollonin nëse një banor i fshatit Berngau i ruante armët e tij ashtu siç kërkon ligji. Asnjëri prej të dyve nuk u kthye nga ajo adresë.

Rreth orës 14 në polici mbërritën disa thirrje për zhurma që ngjanin me të shtëna. Policët e rrethuan shtëpinë dhe para saj e gjetën nëpunësin 45-vjeçar - të vdekur. I dyshuari, një gjerman 60-vjeçar, vetë i telefonoi shërbimit kujdestar: tha se ishte në banesë, se kishte armë zjarri, pranoi se kishte qëlluar dhe paralajmëroi se nuk do të dorëzohej pa rezistencë.

Berngau është fshat me rreth 2.600 banorë. Me orë të tëra ishte nën bllokadë: helikopter mbi çati, automjet i blinduar në rrugë, ndërsa banorët me urdhër policie që të mos dilnin nga shtëpitë. Më vonë, gjatë sigurimit të ndërtesës, policia e gjeti edhe trupin e nëpunëses 54-vjeçare. Sipas policisë, ka shumë të ngjarë që ajo të ketë vdekur menjëherë, që gjatë të shtënave.

Negociatat zgjatën shumë - me telefon, me një njeri që përsëriste me ngulm se nuk do të dorëzohej. Në mes të natës njësitë e policisë hynë në shtëpi me eksploziv. „Sigurisht nuk kaloi pa rezistencë, sepse edhe policët u detyruan të qëllonin“, deklaroi zëdhënësja e policisë. I dyshuari u plagos lehtë në këmbë dhe u arrestua. Për motivin policia tani për tani nuk thotë asgjë.

Kjo nuk është histori për një sistem që dështoi. Dy nëpunës erdhën të kontrollonin nëse armët ishin mbyllur siç duhet, ndërsa një njeri vendosi t'i qëllonte. Të dy po bënin punën më të zakonshme, më burokratike të shtetit - atë kontroll për të cilin askush nuk mendon se mund të përfundojë me vdekje.

Gjermania është ndër vendet me rregullat më të rrepta për zotërimin e armëve në Evropë, me kontrolle që arrijnë deri te dera e pronarit. Nëse atje, me regjistra dhe inspektime, një kontroll rutinë mund të përfundojë kështu, sa armë të mbetura nga vitet nëntëdhjetë ende rrinë të paregjistruara nëpër papafingot ballkanike - dhe kush trokit fare në ato dyer?