BE fshehurazi përgatitet për një sulm hibrid me të vdekur: „Herët a vonë do të ketë viktima“

Ambasadorët e të 27 anëtareve të BE-së javët e fundit po takohen në „format të kufizuar“ - pa telefona celularë, pa ndihmës. Tema është një skenar nga makthet: një sulm i madh hibrid në të cilin do të vdesin disa qytetarë të Unionit. Sipas pesë diplomatëve dhe zyrtarëve evropianë që folën për Politico me kusht anonimiteti, ky skenar është gjithnjë e më i mundshëm.

Bisedimet u intensifikuan pasi në gusht në aeroportin e Lajpcigut u gjet një dron me eksploziv. „Duhet të jemi të përgatitur për diçka serioze. Për fat të keq, Lajpcigu na tregoi se një incident shumë serioz, diçka që do të shkaktonte më shumë viktima, nuk është i paimagjinueshëm“, pranoi një diplomat i lartë evropian. Një zyrtar tjetër është edhe më i drejtpërdrejtë: „Duke pasur parasysh vëllimin e aktiviteteve ruse, herët a vonë me siguri do të ketë viktima. Është fat i pastër që deri tani nuk ka pasur“.

Luftë hibride çdo ditë

BE-ja pothuajse çdo ditë merr raporte për të ashtuquajturat sulme hibride - diversione, sulme kibernetike dhe operacione të fshehta që mbeten nën pragun e një akti të hapur ushtarak. Lista është e gjatë: droni në Lajpcig, zjarri i dyshimtë në stacionin tokësor polak që menaxhon komunikimet e Starlink, plani për vendosjen e mjeteve ndezëse në nyjet e transportit nëpër BE dhe Britaninë e Madhe. Dhe më i fundit - anija mallrash e fundosur me dronë në zonën ekonomike bullgare në Detin e Zi, marinarët e së cilës figurojnë si të zhdukur.

„Është mjaft e qartë se, ndërsa Rusia përdor mjete gjithnjë e më vdekjeprurëse për ta testuar gatishmërinë tonë, në një moment do të ketë viktima“, thotë Teija Tiilikainen, drejtoreshë e Qendrës Evropiane të Ekselencës për Përballimin e Kërcënimeve Hibride. Një diplomat i NATO-s pranon se, nëse vdesin qytetarë të ndonjë vendi aleat, presioni për të vepruar do të jetë i madh.

Kush vendos kur të ndodhë?

Këtu fillojnë problemet. Një pjesë e kryeqyteteve mendojnë se Unioni po e tejkalon mandatin e tij dhe po e dyfishon punën e NATO-s, aleancës që prej gati tetë dekadash është themeli i sigurisë evropiane. „Nëse vjen deri te konfuzioni ose dyfishimi, kjo mund ta ngadalësojë vendimmarrjen, ndërsa koha është gjithmonë vendimtare“, paralajmëroi Oana Lungescu, ish-zëdhënëse e NATO-s. Ursula von der Leyen ndërkohë po shtyn një „protokoll për situata emergjente sigurie“ dhe një Këshill Evropian të Sigurisë, që duhet të gjenden në Strategjinë Evropiane të Sigurisë në fillim të nëntorit. Një pjesë e diplomatëve përgjigjen se mekanizmat ekzistojnë tashmë dhe se përgjigjja e integruar politike ndaj krizave funksionoi mirë edhe gjatë pandemisë.

Ka edhe një problem më të keq - besimi. Disa diplomatë ankohen se BE-ja nuk ka kanale të sigurta komunikimi. Raportet se ish-ministri hungarez i Punëve të Jashtme ia përcillte përmbajtjen e bisedave të liderëve kolegut të tij rus kanë bërë që një pjesë e kryeqyteteve informacionet më të ndjeshme t'i mbajnë vetëm brenda NATO-s. „Ose përfundojnë në media ose shkojnë drejt e në Moskë“, thotë një diplomat nga një shtet i krahut lindor.

Pra, Unioni po përgatitet për një sulm që e konsideron të pashmangshëm, ndërsa ende nuk është marrë vesh as kush do ta ngrejë receptorin kur të ndodhë, as nëse në tryezë guxon të thuhet gjithçka që dihet. Ballkani, me anijen e fundosur në ujërat bullgare, është shumë më afër asaj tryeze se sa duket. A ka ndonjë qeveri në rajon fare një plan të tillë - apo do të pritet viktima e parë që ai të shkruhet?