Ish-princi Andrew e padit policinë që e arrestoi, ndërsa Robert De Niro i porosit: „Duhet ta tërheqë padinë“

Një njeri që humbi titujt, rolin publik dhe gati çdo reputacion tani bën një lëvizje që kurora britanike nuk e ka parë prej shekujsh: Andrew Mountbatten-Windsor e padit policinë që e arrestoi. Ish-duka i Jorkut, dikur djali i preferuar i Elizabetës së Dytë, ka paraqitur kërkesë për rishikim gjyqësor në Gjykatën e Lartë në Londër dhe e kundërshton ligjshmërinë e urdhrave për kontroll që i lëshoi gjykata Old Bailey.

Le ta kujtojmë si arritëm këtu. Më 19 shkurt, pikërisht në ditëlindjen e tij të 66-të, policia e Thames Valley e shoqëroi dhe e mori në pyetje me dyshimin për keqpërdorim të detyrës publike. Shkak ishin dokumentet nga rasti Epstein, sipas të cilave Andrew, ndërsa ishte përfaqësues i posaçëm tregtar i Mbretërisë së Bashkuar, gjoja i përcillte Epstein-it raporte konfidenciale afariste. U kontrolluan edhe shtëpitë e tij, Wood Farm në Sandringham dhe Royal Lodge.

Tani ai pohon se detektivët, gjatë kontrolleve, morën edhe material privat, konfidencial, që nuk ka asnjë lidhje me hetimin. Sipas Telegraph-it britanik, vendimi pritet së shpejti, dhe nëse Andrew fiton, policia do të duhej t'ia kthente gjithçka që sekuestroi. Kjo do të ishte goditje serioze për hetimin që nisi pasi dosjet e Epstein-it dolën në publik këtë vit.

Pallati i Buckinghamit tashmë njoftoi se këtë betejë nuk do ta paguajë. Kjo është ndoshta fjalia më e sinqertë në gjithë historinë: familja mbretërore distancohet nga njeriu që ende është vëllai i mbretit. Sipas mediave britanike, kjo është hera e parë që nga gjykimi i Karlit të Parë në vitin 1649 që një anëtar i familjes mbretërore kundërshton një procedurë gjyqësore. Në Britani tashmë po zhvillohet debati nëse gjykatat civile duhet ta kontrollojnë sjelljen e policisë ndaj anëtarëve të familjes mbretërore, apo Windsorët sërish po marrin trajtim që një i dyshuar i zakonshëm nuk do ta merrte. E hapur është edhe pyetja nëse seanca kyçe do të jetë e fshehtë apo publike.

Nga ana tjetër e Atlantikut, në histori hyri Robert De Niro. Aktori mori pjesë në një protestë masive në parkun Washington Square në Nju Jork, ku kërkohet publikimi i plotë dhe hetimi i dosjeve të Epstein-it, dhe prezantoi bibliotekën shëtitëse që nëpër SHBA i bart të shtypura fizikisht të gjitha 3,5 milionë dokumentet që Departamenti amerikan i Drejtësisë i ka publikuar deri tani.

Kur Sun-i britanik e pyeti nëse Andrew duhet të kërkojë falje, De Niro nuk mendoi gjatë: „Sigurisht, të gjithë ata që ishin të përfshirë duhet ta bëjnë këtë. Duhet ta tërheqë padinë.“ Për aktorin është e pakuptueshme që njeriu, në vend që të japë llogari për të kaluarën e tij, e harxhon energjinë në një kontest gjyqësor me policinë për sende personale të sekuestruara.

Andrew gjithmonë ka pohuar se nuk është i përfshirë, ndërsa me viktimën e Epstein-it bëri marrëveshje jashtëgjyqësore qysh kur nëna e tij ishte gjallë. Nga detyra publike u largua në vitin 2019. Por dosjet vazhdimisht zbulojnë një pamje tjetër të asaj miqësie. E modeli është i njohur edhe jashtë Britanisë: sa herë kemi parë të fuqishëm që, në vend që të japin llogari, i padisin ata që i hetojnë?