I shtati i vdekur nga ethet e Nilit Perëndimor në Maqedoni është një burrë 69-vjeçar nga Gazi Baba, me disa sëmundje kronike, i cili në Klinikën për sëmundje infektive kaloi mbi 38 ditë. Ai ishte pacienti që u trajtua më gjatë nga kjo epidemi.

Informacionin e njoftoi ministri i shëndetësisë Sasho Klekovski. Në të njëjtën periudhë u regjistrua edhe një rast i ri i dyshimtë, nga Radishani, kështu që numri i të hospitalizuarve mbetet 19 - vdekja e njërit dhe pranimi i tjetrit anulohen reciprokisht në statistikë.

Të shtatë janë burra

Kjo është e dhëna që tërheq vëmendjen. Nuk është rastësi e kufizuar në Maqedoni. Sipas të dhënave të Institutit për shëndet publik deri më 25 gusht, nga 50 raste të regjistruara 39 ishin burra dhe 11 gra. Te 49 pacientë u zhvillua forma neuroinvazive - pezmatim i trurit ose komplikime të rënda neurologjike.

Hulumtimet ndërkombëtare e konfirmojnë të njëjtin model. Një studim amerikan me 3.064 pacientë tregoi se burrat kanë rreth 29 për qind rrezik më të lartë nga sëmundja neuroinvazive. Të dhënat e Qendrës amerikane për kontrollin e sëmundjeve tregojnë se te mbi 12.000 raste neuroinvazive të analizuara gjatë një dekade, burrat përbënin 62 për qind, kurse mbi moshën 70-vjeçare numri te burrat ishte më shumë se dyfish më i madh se te gratë.

Shkenca nuk ka përgjigje përfundimtare pse. Burrat nuk infektohen më shpesh - ata më shpesh zhvillojnë formën e rëndë. Mes shpjegimeve të mundshme janë ekspozimi i ndryshëm ndaj mushkonjave, sëmundjet kronike, dallimet imunologjike dhe mënyra si zbulohen e raportohen rastet.

Ajo që është më e sigurt janë faktorët për ecuri të rëndë: mosha mbi 60 vjeç, imuniteti i dobësuar dhe gjendjet kronike - diabeti, tensioni i lartë, sëmundja e veshkave, kanceri. Rreth 80 për qind e të infektuarve nuk kanë fare simptoma, kurse më pak se një për qind zhvillojnë formën e rëndë neurologjike. Nga ata që e zhvillojnë, rreth 10 për qind ndërrojnë jetë.

Epidemia zhvendoset drejt veriut

Rastet e reja vijnë nga Shkupi Veri. Më parë përqendrimi ishte më i madh në Kisela Vodë, sidomos në Dracevë, dhe në Gazi Babë. Epidemia u shpall më 11 gusht në disa komuna shkupjane, të cilat ndërmorën spërkatje të jashtëzakonshme kundër mushkonjave. Qyteti i Shkupit njoftoi dezinsektim të ri nga ajri kundër larvave.

Spërkatja kundër larvave në shtator është reagim, jo parandalim. Mushkonja që e bart sëmundjen shumohet në ujin e ndenjur, kurse uji i ndenjur në lagjet shkupjane nuk u shfaq papritmas në gusht. Nga Instituti për shëndet publik rekomandojnë largimin e ujit të ndenjur nga oborret, vendosjen e rrjetave mbrojtëse në dritare, veshje që e mbulon lëkurën dhe repelentë.

Këto janë këshilla drejtuar qytetarëve. Pyetja që mbetet është kush ishte i ngarkuar për po ato masa në nivel qyteti në qershor dhe korrik, kur mushkonjat po pillnin - e jo në shtator, kur numërohet viktima e shtatë.