Nga foltorja e një kongresi partiak, është e lehtë të flasësh për të vërteta - më e vështirë është t'i provosh kur edhe ti vetë ke qenë në pushtet. Lideri i opozitës SDSM, Venko Filipçe, e shfrytëzoi tribunën për një sulm të ashpër ndaj pushtetit: korrupsioni lulëzon, pohon ai, ndërsa prokuroria përdoret për revanshizëm në vend që të luftojë kundër tij.

„Njerëzit nuk jetojnë nga deklaratat dhe PR-i. Ata jetojnë në kushte çmimesh të larta, pagash të ulëta dhe asnjë sigurie", porositi Filipçe. Dhe shtoi shifra për mbështetje: „Në prill të këtij viti shpenzimet e jetesës u rritën me 5,7 për qind krahasuar me të njëjtin muaj vitin e kaluar. Në industri, punësimi ra me 2,3 për qind në nivel vjetor."

Pjesa më e ashpër kishte të bënte me drejtësinë. „Gjyqësori nuk tregon përparim; pushteti kërkon kontroll të plotë. Në vend që të luftojë korrupsionin, e përdor prokurorinë për revanshizëm dhe sulme ndaj opozitës", deklaroi ai, duke shtuar se edhe liria e mediave po bie, ndërsa demokracia „po shuhet".

E mbylli me një fjali të krijuar për tituj: „Shteti nuk udhëhiqet me kokëfortësi, por me vizion. Shteti nuk mbrohet me justifikime, por me rezultate." Tingëllon mirë - por ia vlen të mbahet mend se të njëjtat kritika, drejtuar sot pushtetit, nesër mund të kthehen si bumerang. Sepse çmimet e larta, drejtësia e dobët dhe presioni mbi mediat nuk u shfaqën brenda natës; janë sëmundje që i trashëgon çdo qeveri në këtë vend, përfshirë edhe atë që e udhëhiqte pikërisht kjo parti. Pyetja për votuesin nuk është kush kritikon më mirë nga opozita - por kush ndryshoi vërtet diçka kur ishte në pushtet.