Gjermania së shpejti do ta publikojë përgjigjen e saj ndaj sulmit të supozuar me dron mbi aeroportin Lajpcig/Hale, lajmëroi kancelari Fridrih Merc. Hetimi është drejt fundit, ndërsa në qeverinë federale, thotë ai, tashmë ekziston konsensus i gjerë se si do të reagohet. Incidenti ndodhi në fillim të gushtit - që do të thotë se „së shpejti“ në këtë rast do të thotë një muaj më vonë.

„Jemi në fazën përfundimtare të hetimit“, deklaroi Merci, duke premtuar se vendimi do të njoftohet ditët në vijim. „Nuk do të zgjasë shumë më gjatë“, shtoi ai. Berlini po përgatitet t'ia atribuojë përgjegjësinë Rusisë dhe javën e ardhshme të shpallë masa më të rrepta. Zyrtarët gjermanë për momentin nuk japin detaje - atribuimi zyrtar vjen pasi të përfundojë hetimi.

Masat koordinohen paraprakisht

Merci ishte i saktë edhe për atë se kush di çfarë do të vijë: „Tashmë është koordinuar. Ditët në vijim do të finalizohet me Bashkimin Evropian dhe me partnerët tanë në NATO.“ Dhe pastaj fjalia që thotë më së shumti: „Do të jetë përgjigje gjermane, por partnerët tanë në BE dhe NATO nuk do të surprizohen prej saj.“

Me fjalë të tjera - përgjigjja është gjermane në nënshkrim, por kolektive në përmbajtje. Kjo është edhe përparësia edhe dobësia e këtij modeli: asnjë shtet evropian nuk përgjigjet më vetëm, por askush nuk mund as të reagojë më shpejt se më i ngadalshmi në grup.

Opsionet janë më të gjera se më parë

Masat e mundshme shkojnë përtej asaj që Berlini tashmë ka bërë - dëbimin e diplomatëve dhe mbylljen e qendrës kulturore ruse. Në tavolinë janë sanksione shtesë dhe furnizime të shtuara me armë për Ukrainën, të koordinuara me paketën e re të sanksioneve që po përgatitet në Bruksel.

Ndërkohë, shërbimet gjermane të inteligjencës gjetën një depo armësh në afërsi të Berlinit. Sipas dyshimeve të tyre, armët mund të kenë qenë të destinuara për operativë rusë që kryejnë atentate me urdhër nga Moska. Nëse kjo konfirmohet, biseda nuk është më për dronë mbi një aeroport, por për diçka që u ndodh shteteve në luftë.

A do të reagojë Evropa në kohë - apo sërish do të koordinohet derisa përgjigjja të humbasë kuptimin? Në Ballkan dihet mirë si duket kur institucionet fillimisht këshillohen gjatë, e pastaj nxitojnë. Dallimi është se këtu këshillimi zgjat një muaj, jo një dekadë.