Platforma për strimim Twitch do të shfrytëzojë përmbajtjen e autorëve të vet për trajnimin e modeleve të inteligjencës artificiale të kompanisë mëmë Amazon. Të gjithë janë kyçur paraprakisht. Kush nuk dëshiron, duhet vetë të gjejë dhe të shkyçë butonin.

Mënyra në të cilën u njoftua thotë çdo gjë. Në vend të mesazhit se Amazon nis të mësojë nga strimet, Twitch shkroi se „shton një cilësim që ju lejon të shkyçeni”. E njëjta punë, e rrotulluar mbrapsht, që të tingëllojë si shërbim ndaj shfrytëzuesit.

Në transmetim në kanalin zyrtar, para gati 3.000 shfrytëzuesish të zemëruar, drejtori për produkt Majk Minton tha atë që zakonisht heshtet. „Pse nuk është me kyçje? Të gjithë këtë e shkruajnë në çat. Kuptoj. Ka përgjigje të sinqertë... Nëse do të ishte me kyçje, nuk do të kyçej askush. Kjo është përgjigjja e sinqertë”, tha Minton. Fjalia është më e shpejtë se çdo analizë: kompania paraprakisht di se njerëzit nuk do të jepnin pëlqim, e për këtë as nuk e kërkon.

Nuk di as ai çfarë është marrë

Kur një shfrytëzues pyeti a janë shfrytëzuar tashmë regjistrimet e tij, Minton u përgjigj se nuk e di përgjigjen sepse nuk di çfarë bëri Amazon dhe çfarë shfrytëzoi deri tani. Drejtori për produkt i platformës nuk di çfarë ka marrë tashmë kompania mëmë nga serverët e kësaj platforme. Kjo nuk është keqkuptim - është përshkrim i marrëdhënies së pushtetit.

Meri Kish, shefe e komunitetit, kujtoi se Twitch nuk është i vetmi. Meta shfrytëzon përmbajtjen publike nga Facebook dhe Instagram për modelet e vet. Në Britaninë e Madhe ekziston mundësia e shkyçjes; në vende të tjera mbrojtja e vetme është profili të jetë i mbyllur, që për një njeri që fiton nga publikimet nuk është zgjedhje. Sipas saj, vetë ekzistenca e butonit për shkyçje është përgjigje ndaj zërit të komunitetit.

Materiali është i vlefshëm pikërisht sepse është njerëzor: orë zëri, fytyrë, reagime, bisedë e drejtpërdrejtë - karburanti më i shtrenjtë për modele që mësojnë të tingëllojnë si njerëz. Njerëzit që e krijuan, e krijuan për publik, e jo për trajnim të një makine që nesër mund të zëvendësojë pikërisht mënyrën e tyre të të folurit.

Butoni ekziston. Gjendet në cilësimet e kanalit - jo në tabelën kontrolluese - nën sigurinë dhe privatësinë, në pjesën për trajnim të inteligjencës artificiale generative. Shikuar prej këtu, ku interneti prej kohësh na mësoi se kutia e shënuar është formalitet, vlen të mbahet mend se një klik sot kushton më pak se çdo ankesë e mëvonshme.