Нафтената индустрија на Србија (НИС), која е под американски санкции поради мнозинско руско сопствеништво, засега не се огласува за информациите дека пратка од околу еден милион барели казахстанска нафта, пристигната во хрватското пристаниште Омишаљ, не е испорачана во Србија.

Според агенцијата „Ројтерс“, танкерот „Маран Хелиос“ пристигнал на 9 октомври, но суровината не е транспортирана до НИС. Хрватскиот „Јадрански нафтовод“ (ЈАНАФ) за медиумите изјави дека последната испорака за НИС била на 8 октомври, додавајќи дека „по тој датум, нема повеќе неиспорачана нафта за НИС во системот“.

Српски медиуми пренесуваат дека, според извори блиски до компанијата, рафинеријата во Панчево има резерви доволни само за околу десет дена работа доколку не пристигнат нови количини сурова нафта.

Претседателот на Србија, Александар Вучиќ, изјави дека очекува одговори во врска со ситуацијата до крајот на оваа или следната недела, нагласувајќи дека тврдењата дека Хрватска ќе стане нов сопственик на НИС се невистинити.

„Нема да има недостиг од сурова нафта, нејзини деривати и нема да има енергетска криза“, порача Вучиќ, додавајќи дека складиштата се полни и дека Србија има доволно резерви до крајот на годината.

НИС беше ставен под санкции на 10 јануари поради т.н. „секундарен ризик“ од руско мнозинско сопствеништво. Санкциите неколку пати беа одложувани, но официјално стапија на сила на 9 октомври.