Околу 30.000 луѓе – граѓани, ученици, наставници, волонтери, вработени во институциите, претставници на амбасадите и јавни личности – учествуваа во големата еколошка акција „Не оставај ѓубре. Остави пример!“ на повеќе од 50 локации низ Скопје. Се чистеше од Градскиот парк и Плоштадот до кејот на Вардар, средишните зеленила на булеварите, маалските паркови и училишните дворови, а свои акции организираа и општините. Со над 100 волонтери се вклучи и Црвениот крст.

Со ракавици и црна вреќа во Градскиот парк беше и градоначалникот Орце Ѓорѓиевски. „Колку и да работат јавните претпријатија, колку и да постапуваат на терен, колку и да го собираат отпадот, секогаш се појавуваат одредени лица кои со нивните девијантни појави придонесуваат неуредно да изгледаат некои површини во градот“, изјави тој. Очекувано, најголем дел од собраниот отпад беа отпушоци.

Градоначалникот посочи и конкретни прекршители: оние што при реновирање ги оставаат старите кујни, креветите и сѐ останато во паркови, на булевари и околу контејнерите. Против правни субјекти, рече, во изминатиот период се изречени казни од над 80.000 евра. Најавени се и нови мерки – градското претпријатие за чистота неделава треба да се зајакне со речиси 30 нови возила, а наскоро пристигнуваат првите од вкупно 3.000 нови контејнери.

Акцијата не треба да остане еднократна: планот е вакви чистења да се организираат двапати месечно, по можност во среда, а во следните ќе се вклучат и компании. Масовноста е силна порака. Но ниту една генералка не го решава секојдневниот проблем: дел од камионите за чистење на улиците се стари и често се расипуваат, а кабастиот отпад и натаму завршува покрај булеварите.

Успехот на една еколошка акција не се мери со тоа колку луѓе еден ден земале метла, туку со тоа колку ѓубре ќе има следниот пат. Ако по две недели на тие места повторно се собираат отпушоци и стари кревети, тогаш 30.000 луѓе не го исчистиле градот, туку само го позајмиле за еден ден. Затоа казните од 80.000 евра се поважна вест од бројот на полни вреќи. Дали ќе ги има повеќе и дали ќе стигнат и до поединците што фрлаат?