„Треба да отвориме нова стратегија за приближување на земјите од Западен Балкан кон Европската Унија, не сакам да ве изгубам“, одговори Мерц на прашањето што му го постави црногорскиот премиер во врска со проширувањето на ЕУ.

Германскиот канцелар Фридрих Мерц вели дека се чувствува непријатно поради пристапот на Европската Унија кон Западен Балкан и верува дека е потребна нова стратегија за приближување на регионот кон ЕУ.

На прашањето на црногорскиот премиер Милојко Спајиќ на Минхенската безбедносна конференција дали ЕУ е заинтересирана да го прифати Западен Балкан и дали проширувањето е дел од планот за да се направи Европа поконкурентна на светската сцена, германскиот канцелар одговори потврдно. Мерц додаде дека тој и претседателката на Европската комисија Урсула фон дер Лајен се согласуваат по ова прашање.

„Во декември имавме состанок со Западен Балкан и Европскиот совет во Брисел. И искрено, се чувствувам сè понепријатно поради нашиот пристап кон вашите земји. Мораме повторно да отвориме нова стратегија за да ги приближиме овие земји кон Европската Унија. Не сакам да ве изгубам. Вие сте дел од европскиот континент и затоа потенцијално сте дел од Европската Унија. И знам дека ова е консензусот“, рече германскиот канцелар.

Мерц додаде дека постои „слон во просторијата“ и дека сите знаат кој е против тоа, но дека тоа мора да се надмине.

„Сега е потребно едногласно гласање во Европскиот совет за да се отвори следното поглавје, но ние мора да го надминеме тоа. Најдоцна по изборите, кои ќе се одржат во април, се надеваме дека ќе можеме да ги отвориме следните поглавја и на крајот да ве доближиме како членки до Европската Унија“, рече Мерц.