Во Србија е во тек координирана акција за апсење на членови на организирани криминални групи, во која учествуваат Управата за криминалистичка полиција и Специјалната антитерористичка единица. Според РТС, рациите се изведуваат на повеќе од 30 локации низ земјата.

Целта на акцијата е сузбивање на организиран криминал и други тешки кривични дела. Белградските медиуми јавуваат дека фокусот е ставен на припадници на врачарскиот клан и нивните соработници.

Акцијата се спроведува во координација со надлежното обвинителство и со поддршка од европската правосудна агенција Евроџаст.

Таканаречениот клан Врачар, предводен од Никола Вушовиќ — Џони од Врачар, е обвинет за три убиства и пет обиди за убиства. Вушовиќ беше уапсен во Барселона и екстрадиран во Австрија, каде што доби 12 години затвор за планирање ликвидација на припадник на ривалски клан.

Според најавите од српските власти, акцијата продолжува и во текот на денот, а се очекува поголем број апсења и заплени на имот поврзан со криминални активности.