Фудбалерот Алваро Мората и неговата сопруга, италијанската претприемачка Алис Кампело, си дадоа трета шанса – само пет месеци откако на почетокот на 2026 го најавија крајот на бракот. Приказна што многумина веќе ја отпишаа, се чини, сè уште не е завршена.

Двојката е заедно речиси десет години и има четири деца – близнаците Алесандро и Леонардо, кои на 29 јули полнат осум години, петгодишниот Едоардо и тригодишната Бела. Низ тие години поминаа низ прва разделба и помирување, па втора разделба што во јануари годинава стигна дури до бракоразводна постапка.

Мората беше искрен за коренот на проблемот: „Страдаме затоа што сме двајца луѓе што се сакаат, но не се разбираат.” Реченица што кажува повеќе од која било изјава за медиумите – бидејќи токму таа разлика, меѓу љубовта и разбирањето, ги растура и најцврстите врски.

Помирувањето стана јавно кога двајцата заедно се појавија на концерт во Мадрид. Алис подоцна се заблагодари на сите што ѝ пратиле пораки на поддршка и нагласи дека работите изградени со почит и грижа на крајот успеваат. Двајцата истакнаа дека зад разделбата немало трета личност – само проблем во комуникацијата.

Дали третата шанса ќе биде и последната, никој не знае. Но во свет каде секоја разделба на познати лица се претвора во спектакл, овие двајца барем не се преправаат дека е лесно. А тоа, во кафанска смисла, е поискрено од сите совршени фотографии на среќни парови.