Претседателот на Србија, Александар Вучиќ, синоќа изјави дека против државата се води „сериозна хибридна војна“ и дека досега имало повеќе од 25.000 непријавени собири низ земјата. Во интервју за РТС, тој нагласи дека како претседател направил сè за да го зачува мирот и стабилноста, додавајќи дека наскоро ќе биде јасно дали уапсениот В.А. е „терорист или убиец во обид“.

Вучиќ истакна дека јавноста треба да го види видеото од апсењето и изјавата на осомничениот, за да се спречи „погрешно информирање на јавноста“ дека станува збор за обичен конфликт меѓу луѓе кои престојуваат во шаторите пред парламентот. Тој порача дека е подготвен за дијалог со неистомислениците, но дека не може да разговара со некој „кој решава проблеми со пиштоли и стапови“.

Инцидентот се случи вчера кога В.А. влегол во еден од шаторите во кои престојуваат поддржувачи на власта и испукал неколку куршуми, при што повредил едно лице. Нападот, според Вучиќ, претставува терористички чин, а обвинителството го квалификува како обид за убиство, нелегално поседување и трговија со оружје, како и предизвикување општа опасност.

Во делот за надворешната политика, Вучиќ изрази уверување дека постојат шанси Србија да стане членка на ЕУ до 2030 година, но нагласи дека косовското прашање останува главна пречка. „Не можам и нема да ја прифатам независноста на Косово и Метохија. Ако некој друг по мене сака тоа да го направи – нека го реши“, изјави српскиот претседател.

На прашањето дали е поважно Србија да не воведува санкции кон Русија или да се движи побрзо кон ЕУ, Вучиќ одговори дека верува оти во Брисел сега постои нов замаец и дека ЕУ „повеќе од порано разбира колку е Србија важна за Унијата“.

„Европската унија е најголем инвеститор и сè уште најдоброто место за живеење, иако економскиот раст е во пад“, додаде тој.

Вучиќ се осврна и на средбата со претседателката на Европската комисија Урсула фон дер Лајен, одржана минатата недела во Белград, велејќи дека имале „долг приватен разговор за сите важни теми“.

Во однос на енергетиката, Вучиќ изјави дека Србија нема да се соочи со недостиг на нафтени производи, и покрај американските санкции кон Српската нафтена индустрија (НИС). „Првиот ден кога ќе имаме проблеми, ќе ги земеме работите во свои раце и ќе ја заштитиме Србија“, рече тој, без да прецизира конкретни мерки за намалување на мнозинскиот руски удел во НИС.

Од воведувањето на санкциите на 9 октомври, околу 84.000 тони нафта од државните резерви биле продадени за преработка во рафинеријата во Панчево, а Вучиќ откри дека побарал од руската страна, доколку нема друго решение, да пронајде купувач за НИС.

Тој потврди и договор со унгарскиот премиер Виктор Орбан за зголемен увоз на нафтени деривати преку компанијата МОЛ, и додаде дека Србија „се обидува да најде различни опции“, иако просторот за маневрирање е ограничен.