Реал Мадрид доби службено „не” од другата страна на градот. Атлетико Мадрид ја одби понудата од 150 милиони евра за Хулијан Алварез и порача кратко: аргентинскиот напаѓач има откупна клаузула од 500 милиони – или ја плаќате, или нема што да разговараме. Истата порака претходно ја доби и Барселона, чија почетна понуда од 100 милиони заврши во истата фиока.

Проблемот на Реал не е само во цената – проблемот е во ветувањето. За време на изборната кампања во клубот, Флорентино Перез вети „Галактико како Кристијано Роналдо и Кака” за 150 милиони евра. Звучи одлично на трибина пред членството. Но пазарот во 2026 не е пазарот од 2009 – за 150 милиони денес не се купува сон, се купува одбивање.

Резервните соништа не изгледаат поблиску. Мајкл Олисе е желба, но Баерн Минхен тврди дека крилото не се продава. Витиња тешко се мрда од Париз. За Алварез се заинтересирани и Арсенал и ПСЖ, но ниту еден од нив не отишол подалеку од интерес. Останува Енцо Фернандез – Челси е отворен за продажба и играчот е на радарот на Мадрид, само што неговото име не полни насловни страници како Олисе, Алварез или Витиња. А Галактико кој не полни наслови не е Галактико.

Во меѓувреме, Реал не седи со скрстени раце. Ибраима Конате и Дензел Дамфрис се веќе договорени како слободни агенти, за левиот бек на листата се Рикардо Калафиори од Арсенал и Јошко Гвардиол од Манчестер Сити, а се чека и одлука за активирање на откупната клаузула од 9 милиони за Нико Паз. Солидна пазарна програма – само без круната.

И тука е целата иронија на летото во Мадрид: претседател што вети спектакл, а клубови што веќе не продаваат спектакл за тие пари. Кој ќе попушти прв – Перез со чековната книшка, или ветувањето од кампањата?